İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 470 Hüküm no: 587 Orijinal metin no: [244-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Mustafa’nın, kardeşi Rukıye aleyhindeki arsa davasından men olunması On zirâ‘ arsa nizâ‘ından men‘ Ma‘rûz, İstanbul’da Müftü Hamamı kurbünde Kâtib Hüsrev mahâllesinde sâkine ve zâtı mu‘arrefe arzuhâl eden Zeyneb bt. Mustafa Çarşamba günü huzûr-ı âlîlerinde ma‘kūd meclis-i şer‘-i enverde nezâret-i dâ‘îlerinde olan evkāfdan zikr olunan Kâtib Hüsrev Vakfı’ndan olan zikri âtî arsaya bâ-re’y-i mütevellî vâzı‘atü’l-yed olan karındaşı arzuhâlde mezkûr Rukıye bt. el-mezbûr Mustafa tarafından sâbitü’l-vekâle vekîli oğlu Mehmed Emin mahzarında mahâlle-i mezbûrede etrâf-ı erba‘ası el-Hâc Osman ve mezbûre Zeyneb’in âhara ferâgat eylediği menzil ve tarîk-i âm ile mahdûd arsa üzerinde olan üç kepenk bir harâb dükkân karındaşım mezbûre Rukıye’nin tasarrufunda olup lâkin dükkân-ı merkūmun verâsında mezbûr el-Hâc Osman menzili tarafında vâki‘ olup kıbel-i şer‘-i şerîfden keşif olunduğu üzere tahmînen on zirâ‘ arsa benim tasarrufumda iken kız karındaşım müvekkile-i mezbûre Rukıye bi-gayrı hakkın vaz‘-ı yed eder deyü vakf-ı mezbûrun mütevellîsi hâzır olduğu hâlde da‘vâ, vekîl-i mezbûr dahi cevâbında müvekkile-i mezbûre Rukıye ferâgat eylediği menzilinden zirâ‘ı beynlerinde ma‘lûm arsayı re’y-i mütevellî ile karındaşı işbu müdde‘iye-i mezbûreye ferâgat eyledikde ol dahi ba‘de’l-kabûl hâlâ iddi‘â eylediği arsaya müte‘allıka da‘vâdan müvekkile-i mezbûrenin zimmetini ibrâ eyledi deyü def‘ini udûlden oldukları ihbâr olunan mahâlle-i mezbûrede sâkin bağcı Abdullah b. el-Hâc Bektaş ve Hacı Mustafa b. Mehmed nâm kimesneler şehâdetleriyle isbât etmeğin mûcebiyle müdde‘iye-i mezbûre Zeyneb arsa-i mezkûre için şer‘an mu‘ârazadan men‘ olunduğu mübâşiri iltimâsıyla huzûr-ı alîlerine i‘lâm [olundu]. Fî 29 min-Şa‘bân sene [1]179.