İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 469 Hüküm no: 586 Orijinal metin no: [244-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kendisine emanet edilen parayı çaldırması nedeniyle hapsedilen Mehmed Ali’nin hasmı ile muhakeme edilmek üzere hapisten çıkarılarak Bursa’ya gönderilmesi Kapan-ı dakīk önünde gemide heybe içinde 1110 guruş zâyi‘ etmekle Bursa’da murâfa‘a Ma‘rûz, Vârid olan fermân-ı âlîlerine imtisâlen işbu arzuhâle ve derkenâra nazar olunup husûs-ı mezkûr tefahhus olundukda Bursa Mütesellimi Osman Bey’in derkenârda isimleri mezkûr mahbûslardan Mehmed Ali yediyle irsâl eylediği heybe içinde olan bin yüz guruşu mezbûr Mehmed Ali Unkapanı önünde gemide bırakıp reisi Halil ile taşra çıkdıkda gemide heybenin yanında hâzır olan Zapira nâm zimmî heybeyi alıp firâr eylediği mezbûr Mehmed Ali’nin takrîri ile müte‘ayyin ve dahi merkūm hâlâ ele girmeyip hayât ve memâtı ma‘lûm olmamağla mezbûr Mehmed Ali heybeyi mahâll-i mezkûrda emîn olmayan zimmî-yi merkūm yanında bırakıp izâ‘at eylediğinden tazmîn lâzım geleceği zâhir olup lâkin bu tarafda da‘vâcısı olmayıp hâlâ Bursa’da olmağla mezbûr Mehmed Ali Bursa’da hasmıyla murâfa‘aya râzı ve reis-i merkūm Halil’e ve neferleri Mustafa ve Hüseyin ve Eyüb ve Davit ve Togodoş’un neferâtına ve hîn-i mutâlebede ihzârlarına gemi sâhibi olup Zindankapısı’nda Resenci Abdurrahman kefil ve mezbûr Abdurrahman’a dahi resenciler kethüdâsı es-Seyyid el-Hâc Ali ve Yiğitbaşı es-Seyyid Osman ile Haffâf Ali kefil olmalarıyla mezbûr Mehmed Ali Bursa’da hasmı ile murâfa‘a olmak üzere ve reis ve neferleri dahi tekfîl ile hapisden ıtlâk istid‘â eyledikleri iltimâslarıyla huzûr-ı âlîlerine i‘lâm olundu. Fî 29 min-Şa‘bân sene 1179.