İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 471 Hüküm no: 589 Orijinal metin no: [245-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Mehmed’in, kardeşinin kızı Zübeyde aleyhindeki menzil davasında anlaşma sağlanması Neslişah Sultân mahâllesi Avârız Vakfı’ndan hâne nizâ‘ı ocak bazergânlarıyla Ma‘rûz, Dergâh-ı âlî yeniçerileri çorbacılarından müteveffâ Mehmed Ağa b. Süleyman’ın sulbî oğlu Süleyman meclis-i şer‘-i hatîrde diğer oğlu olup babasından sonra vefât eden Molla Ahmed’in sulbiye kebîre kızı olup mahmiye-i İstanbul’da nezâret-i dâ‘îlerinde olan evkāfdan Edirnekapısı dâhilinde Neslişah Sultân mahâllesi Avârız Vakfı’ndan olan mahâlle-i mezbûrede vâki‘ etrâf-ı erba‘ası Ali Efendi veresesi ve Pirinçci Ahmed menzili ve Hasan Efendi bostanı ve tarîk-i âm ile mahdûd menzile vâzı‘atü’l-yed olan Zübeyde tarafından vech-i âtî üzere tasdîka sâbitetü’l-vekâlet vekîli anası Zeyneb mahzarında vakf-ı mezbûr mütevellîsi vekîli hâzır olduğu hâlde menzil-i mezkûr bin yüz kırk sekiz senesinde müteveffâ-yı mezbûr Çorbacı Mehmed Ağa’nın tasarrufunda iken Davit nâm Yahûdîye olan bin üç yüz elli guruş deyn mukābelesinde vefâen ferâgat edip kable’l-fekk merkūm Davit hâlik olup menzil-i mezkûr oğulları Bako ve Paruh ve İsak ile kızı İlya ve zevcesi Kılara yedlerinde iken mezbûr Mehmed Ağa fevt olmağla oğlu merkūm Bako menzil-i mezkûru yetmiş bir senesinde üzerine geçirip ba‘dehû yetmiş iki senesinde müteveffâ-yı mezbûr Çorbacı’nın oğlu Molla Ahmed üzerine ferâgat tarîkiyle geçirdip sonra hâlik olup ve mütevellî temessüküne dahi bu minvâl üzere ba‘de’t-tahrîr mezbûr Molla Ahmed dahi fevt olup menzil-i mezkûr kızı müvekkile-i mezbûre Zübeyde’ye intikāl ve hâlâ yedinde olmağla mezbûr Süleyman menzil-i mezbûr ber-vech-i muharrer deyn-i mezkûru mukābelesinde vefâen ferâğ olunup babam mezbûr deyn-i mezkûru edâ etmekle nısfı bana intikāl eder deyü iddi‘â ve nizâ‘ etmekle müvekkile-i mezbûre Zübeyde malından mezbûr Süleyman’a üç yüz guruş verip ve da‘vâsından mezbûr Süleyman’ın zimmetini ibrâ etdikde ol dahi kabz ü kabûl ve menzil-i mezkûrun nısfına müte‘allıka da‘vâdan müvekkile-i mezbûre Zübeyde’nin zimmetini ba‘de’l-ibrâ ve’l-kabûl gerek hâlik-i merkūm Davit ve gerek Bako’nun verâsetleri tarafından sâbitetü’l-vekâle vekîli Ocak yazıcılarından Halil meclis-i şer‘de mûrisleri hâlikân-ı merkūmânın istifâ-yı deyn-i mezkûr edip fekk-i ferâğ etdiklerini meclis-i şer‘-i şerîfde ikrâr ve menzil-i mezkûr kat‘â müstakillen mezbûre Zübeyde üzerinde olmasını mütevellî-i mezbûr dahi re’y edip bu minvâl üzere kat‘-ı münâza‘a eyledikleri mübâşiri iltimâsıyla huzûr-ı âlîlerine i‘lâm olundu. Fî 24 min-Şevvâl sene [1]179.