İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 472 Hüküm no: 590 Orijinal metin no: [245-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Mehmed Ağa’nın Dülger Kalfası Avram’a inşa ettirdiği menzilde keşif yapılması Keşf der-kurb-ı Kocamustafapaşa Ma‘rûz, Sâdır olan fermân-ı âlîlerine imtisâlen cânib-i şer‘-i enverden irsâl olunan müderrisîn-i kirâmdan keşif nâibimiz es-Seyyid Halil Efendi dâ‘îleri ve Hâssa mi‘mârlarından Başhalîfe Mehmed ve Kâtib Mehmed Emin ve İsmail Halîfeler ile mahmiye-i İstanbul’da Koca Mustafa Paşa Câmi‘-i şerîfi mahâllesinde vâki‘ zikri âtî menzile varıp akdeylediği meclis-i şer‘-i kavîmde arzuhâl eden Dülger Kalfası Avram v. Melkon zü‘amâdan arzuhâlde mezkûr Esîrî Mehmed Ağa mahzarında işbu derûnunda akd-i meclis-i şer‘-i şerîf olunan bir tarafı Kürkçübaşızâde Ahmed Efendi menzili ve bir tarafı kefere menzilleri ve bir tarafı Odabaşı arsası ve bir tarafdan tarîk-i âm ile mahdûd mülk menzilin mezbûr Kürkçübaşızâde Ahmed Efendi menzili tarafında vâki‘ dâhiliyesini mezbûr Mehmed Ağa’nın bi-şarti’r-rücû‘ emriyle beher zirâ‘ı altışar guruş on beşer paraya olmak kavliyle menzil-i mezkûrun henüz tamâm olmayan ulyâsında üç bâb oda ve bir köşk ve kenîf ve bir sofa ve dîvânhâne ve vüstâsında dört bâb oda ve bir sagīr kahve odası ve kenîf ve bir sofa ve dîvânhâne ve taş duvarlar ve havâle duvarlarını müceddeden kendi malım ve kerestem ve amelem ile binâ ve dört bin yedi yüz elli guruş sarf etmekle meblağ-ı merkūmun iki bin beş yüz guruşunu bi’d-defa‘ât nakden ve dört yüz elli guruşunu ebniye-i mezkûre mahâllinde mevcûde iştirâ eylediğim enkāz semeninden ahz ve bâkī bin yedi yüz kırk guruşunu [246] dahi rücû‘ murâd ederim deyü da‘vâ, ol dahi cevâbında müdde‘î-i mesfûrun menzil-i mezkûrun bi-şarti’r-rücû‘ emriyle binâsına ancak iki bin beş yüz guruş sarfını tasdîk ziyâde bin yedi yüz kırk guruş sarfını inkâr etmeğin mezbûrân talebiyle zikr olunan mi‘mârlar ebniye-i mevcûdeyi misâha ve tahmîn ü takvîm ve Ser-mi‘mârân-ı hâssa Mehmed Tahir Ağa’nın hatemi ile mahtûm müfredât defteri mantûku üzere mezbûr Mehmed Ağa’nın uhdesinde aldığı mecmû‘ duvar camları ve nakkāşların masârıf ve yevmiyelerinden mâ‘adâ ebniye-i mezkûre iki bin yedi yüz on yedi guruş ve yirmi üç akçe ile olur noksân ile olmaz deyü icmâ‘ ve ittifâk eylediklerini mezbûr dâ‘îleri mahâllinde tahrîr ve gelip ümenâ-yı şer‘le inhâ eyledikleri bi’l-iltimâs huzûr-ı âlîlerine i‘lâm olundu. Fî 27 min-Ş sene 1179.