İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 473 Hüküm no: 591 Orijinal metin no: [246-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah Hatun’un Ubeydullah bt. Abdullah’dan muhalaa usulüyle boşanması ve küçük kızı için nafaka tahsisi Mestçizâde Efendi’nin kerîmesi, Şeyh Abdullah Efendiyle muhâla‘a Ma‘rûz, Mevâlî-i izâmdan merhûm Mestçizâde Osman Efendi’nin kerîmesi olup arzuhâl eden Nimetullah nâm hatun tarafından vech-i âtî üzere ikrâra vekîli olduğu zâtını ârifân es-Seyyid Abdullah b. Ahmed ve Hâfız İbrahim b. Mehmed şehâdetleriyle sâbit olan anası Âişe bt. Abdullah meclis-i şer‘-i enverde derûn-ı arzuhâlde mezkûrü’l-ism eş-Şeyh Abdullah [Ubeydullah] b. eş-Şeyh Abdullah Efendi mahzarında müvekkilem kızım mezkûre Nimetullah’ın mezbûr Ubeydullah iki yüz elli guruş mehr-i müeccel tesmiyesiyle zevc-i dâhili olup beynlerinde hüsn-i mu‘âşeretleri olmamağla mehr-i mezkûru ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere hul‘ oldukda ol dahi hul‘u kabûl ve hukūk-ı zevciyetden birbirinin zimmetlerini ibrâ ve iskāt eylediler deyü ikrârını mezbûr Ubeydullah ba‘de’t-tasdîk müvekkile-i mezbûrenin malından yedinde olan bir sîm gülâbdân ve buhurdan ve bohça ve bir sofra ve bir kavuk örtüsünü rızâsıyla vekîl-i mezbûreye teslîm ol dahi yedinden alıp mezbûr Ubeydullah’ın malı olan bir leylâkī şalı teslîm ve vekîl-i mezbûrenin iddi‘â eylediği mecmû‘u elli dört guruş kıymetli iki minder ve iki yorgan ve üç çarşeb ve bir şilte ve bir tencere için ityân-ı beyyineden izhâr-ı acz ile mezbûr Ubeydullah’a yemîn verdikden sonra mezbûreden mütevellide sulbiye sagīre kızı Fâtıma’nın nafakası için rızâlarıyla külle yevm kıbel-i şer‘-i enverden yirmişer akçe farz ve takdîr ve istidâne ve rücû‘a müvekkile-i mezbûreye izin verildiği tescîl-i şer‘î olunup mübâşiri Çavuş kulları iltimâsıyla huzûr-ı âlîlerine i‘lâm olundu. Fî-gurreti Ramazani’l-mübârek sene 1179.