İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 473 Hüküm no: 592 Orijinal metin no: [246-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bozcaada’ya sürgün edilmiş olan Akşehirli Berber Hasan’ın serbest bırakılması Bozcaada’dan ıtlâk Ma‘rûz, Derkenâr olduğu vech üzere kârhânecilik töhmetiyle işbu sene Saferi’l-hayrı’nın altıncı günü Bozcaada’ya nefy olunan Akşehirli Berber Hasan’ın keyfiyeti suâl olunmak bâbında sâdır olan fermân-ı âlîlerine imtisâlen mezbûr Hasan arzuhâl eden Alime’nin oğlu ve Lâleliçeşme kurbünde Berber ve Mercimek mahâllesinde sâkin olup ashâb-ı vukūfdan mahâllesi İmamı Hüseyin Efendi ve müezzini es-Seyyid Mustafa ve Koltukçu Osman ve Sırmakeş İbrahim ve Kâtib Halil ve Mesihpaşa Câmi‘i İmamı el-Hâc Ahmed Efendi ve sâir on dokuz nefer mazbutü’l-esâmi Müslimîn meclis-i şer‘-i enverde töhmet-i mezkûre mezbûr Berber Hasan hakkında iftirâ olup ve müttehem olduğu sûretde dahi müddet-i mezkûreden beru te’dîb olunduğunu ve fîmâ-ba‘d ol misillü hareketde olmayıp kendi hâlinde olmak üzere nefsine ve hîn-i mutâlebede ihzârına her biri kefil ve kefâletleri tescîl olunup ve mezbûr afv ü ıtlâkını istirhâm eyledikleri iltimâslarıyla huzûr-ı âlîlerine i‘lâm olundu. Fî-gurreti min-Ramazan sene 1179.