İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 474 Hüküm no: 593 Orijinal metin no: [246-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipahi Pazarı sokağındaki fırıncı Bogos’un, fırını bitişiğindeki arsanın kira sözleşmesini feshederek sahiblerine iade etmesi Galata’da vâki‘ fırına icâre kavliyle ilhâk olunan arsadan fesh-i akd Ma‘rûz, Galata’da Arab Câmi‘i kurbünde Sipâhî Pazarı sokağında bir tarafla Elvanzâde Vakfı ve bir tarafdan fırın ve bir tarafdan Kara Emin Vakfı ve bir tarafdan tarîk-i âm ile mahdûd terbî‘an yüzelli zirâ‘ dükkân arsası Mehmed Reis Vakfı’ndan altı hisse i‘tibârıyla üç hissesi Abdullah Bey b. İbrahim Bey’in ve üç hissesi dahi Hadîce ve Emine ve Ümmühani üzerlerinde olduğu vakıf temessükü mantûkunca müte‘ayyen oldukdan sonra arzuhâl eden mezbûrûn Abdullah Bey ve Hadîce ve Emine ve Ümmühani taraflarından sâbitetü’l-vekâlet vekîli el-Hâc Hasan b. Mustafa meclis-i şer‘-i enverde arsa-i mezkûreye bi’l-icâre vâzı‘ü’l-yed olan arzuhâlde mezkûr Bogos muvâcehesinde zikr olunan fırın-ı mesfûr Bogos’un tasarrufunda olmağla bundan akdem merkūm fırını tecdîd ve binâ esnâsında arsa-i mezkûreyi bizden beher şehr on bir guruş ve bir rub‘ [247] icâre kavliyle isticâr ve mezkûr fırına ilhâk edip şimdi icâre-i mezkûreyi edâda mümâtale eder deyü bi’l-vekâle da‘vâ etdikde mezbûr Bogos cevâbında arsa-i mezkûreyi tasarrufunda olan fırın-ı mezkûre ilhâkını ikrâr lâkin beher şehr yüzer para icâre kavliyle isticâr etmiş idim deyü ziyâde icâreyi inkâr ve işbu gurre-i Ramazan-ı şerîfde dahi yüzer paradan ziyâde icâre ile kabûl etmeyip arsa-i mezkûreyi fesh-i icâre edip teslîme ta‘ahhüd etdikde vekîl-i mezbûr dahi arsa-i mezkûreyi bu vechile tesellüme râzı olduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî-gurreti Ramazan sene 1179.