İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 475 Hüküm no: 594 Orijinal metin no: [247-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hicri 1179 senesi Ramazan hilalinin tesbiti İsbât-ı hilâl-i Ramazan Ma‘rûz, Zikri âtî husûs hukūkullah-ı sırfeden olup bilâ-da‘vâ istimâ‘-ı şehâdet emr-i meşrû‘ olduğuna binâen işbu bin yüz yetmiş dokuz senesi Şa‘bâni’l-mu‘azzamı’nın yirmi dokuzuncu yevm-i isneyn leyle-i selâsede ba‘de’l-gurub bi’l-müşâhede havada gaym olduğu hâlde mahmiye-i İslambol’da merhûm Fatih Sultân Mehmed Han Câmi‘-i şerîfi’nin sağ minâresinde Müezzin Hüseyin Efendi b. İsmail ve Molla Mehmed b. Ali ve dâ‘îhâneden es-Seyyid Mustafa b. Ahmed ve Abdi b. Hâfız Ömer ve sâir mazbûtü’l-esâmi kimesneler li-ecli’ş-şehâde mahmiye-i mezbûrede meclis-i şer‘-i münîrde hâzirûn olup biz bin yüz yetmiş dokuz senesi Şa‘bân-ı şerîfi’nin yirmi dokuzuncu Pazartesi günü ki Salı gecesi ba‘de’l-gurub câmi-i mezkûrun sağ minâresinde iltimâs-ı hilâl-i Ramazan-ı şerîf eylediğimizde ukf-ı semâda hilâl-i Ramazan-ı mübâreki iki uçları kıble cânibine müteveccihen re’yü’l-ayn müşâhede eyledik deyü edâ-yı şehâdet-i hasbiye-i şer‘iyye etmeleriyle yarınki Salı günü ibtidâ-yı Ramazan-ı şerîf olmağla îkād-ı kanâdîl-i minâre için Selâtîn-i izâm kayyûmlarına tenbîh ve ifhâm olunacağı ma‘lûm-ı devletleri buyruldukda emr ü fermân hazret-i men-lehü’l-emrindir. Fî 29 Ş sene 1179.