İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 475 Hüküm no: 595 Orijinal metin no: [247-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah Hatun’un boşandığı eşi Ubeydullah’dan olan ve yanında bulunan küçük kızı Fatıma için nafaka tahsisi Muhâla‘a-i kerîme-i Mestçizâde Mahmiye-i İstanbul’da Zeyrek kurbünde sâkine mevâlî-i izâmdan Mestçizâde Osman Efendi’nin kerîmesi işbu bâ‘isetü’l-kitâb Nimetullah nâm hatun tarafından husûs-ı âti’z-zikrde vekîl olduğu zâtını ârifân es-Seyyid Abdullah b. Ahmed ve Hâfız İbrahim b. Mehmed nâm kimesneler şehâdetleriyle sâbit olan vâlidesi zâtı mu‘arrefe Âişe bt. Abdullah meclis-i şer‘-i şerîf-i enverde müvekkile-i mezbûrenin zevc-i muhâlı‘ı eş-Şeyh Ubeydullah Efendi mahzarında bi’l-vekâle ikrâr ve takrîr-i kelâm edip müvekkilem kızım mezbûre Nimetullah’dan mütevellide ve zevc-i muhâlı‘ı işbu mezbûr Ubeydullah’ın firâşından hâsıla hacr ve terbiyesinde olan Fâtıma nâm sagīrenin malı olmağla kıbel-i şer‘-i şerîfden kadr-ı kifâye meblağ farz ve takdîr ve babası mezbûr üzerine rücû‘a izin verilmesi bi’l-hıdâne müvekkilem mezbûrenin matlûbudur dedikde gıbbe’t-tasdîki’ş-şer‘î a‘lâ-yı kitâbı tevkī‘leriyle terfî‘ buyuran efendi hazretleri dahi târîh-i kitâbdan külle yevmin tarafeynin rızâlarıyla yirmişer akçe farz ve takdîr buyurup meblağ-ı mefrûz-ı mezkûr yirmişer akçeyi sagīre-i mezbûrenin nafakasına harc u sarfa ve lede’l-hâce istidâneye ve vakt-i zaferde babası mezbûr Abdullah’ın üzerine rücû‘a müvekkile-i mezbûre Nimetullah’a izin birle mâ-vaka‘a bi’t-taleb ketb olundu. Fî-gurreti Ramazan sene 1179. Şuhûdü’l-hâl: Es-Seyyid Abdullah b. Ahmed ve Hâfız İbrahim b. Mehmed ve Molla Mehmed ve Molla İsmail ve Molla Osman ve gayruhum.