İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 476 Hüküm no: 596 Orijinal metin no: [248-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Ali’nin kendi bahçesinden taş çıkarırken komşusu Mehmed’in yıkılan duvarını yeniden inşa etmeyi taahhüt etmesi Keşf der-kurb-ı Kule-i hefte Ma‘rûz, Vârid olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri Hâssa mi‘mârlarından Yahya ve Mustafa ve sâir ümenâ-yı şer‘le mahmiye-i İstanbul’da Yedikule kurbünde el-Hâc İlyas mahâllesinde vâki‘ Yedikule derûnunda mebnâ Câmi‘-i şerîf imamına gallesi meşrûta <> sâhib-i arzuhâl Mehmed b. İbrahim tasarrufunda olan menzile varıp huzûr-ı Müslimînde akdeylediği meclis-i şer‘-i şerîfde mütevellî-i vakıf Çam Mehmed Efendi hâzır olduğu hâlde mezbûr Mehmed b. İbrahim arzuhâlde mezkûr câr-ı mülâsıkı Osman b. Ali mahzarında mezkûr Osman dört sene mukaddem bahçesinden taş çıkardırken zuhûr eden mermer sütunu ihrâç etdikde tûlen yirmi kadden altı zirâ‘ otuz guruş kıymetli duvarımı hedm edip mûcibini taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını udûlden mahâlle-i mezbûrede sâkin Debbâğ el-Hâs Süleyman b. el-Hâc Ahmed ve Mehmed Ağa b. el-Hâc İsmail nâm kimesneler şehâdetleriyle isbât ve mezbûr Osman dahi duvar-ı mezkûru ke’l-evvel malından binâya ta‘ahhüd etdikde müdde‘î-i mezbûr dahi râzı ve bu minvâl üzere kat‘-ı münâza‘a eylediklerini mezbûr dâ‘îleri mahâllinde tahrîr ve gelip ümenâ-yı şer‘le inhâ eylediği bi’l-iltimâs huzûr-ı âlîlerine i‘lâm olundu. Fî-selhi Şa‘bân sene 1179.