İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 476 Hüküm no: 597 Orijinal metin no: [248-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata Sarayı’na verilecek unun fiyatının belirlenmesi Galata Sarayı’na ta‘yîn olunan dakīkin fiâtı nizâmı Ma‘rûz, Galatasaray-ı hümâyûnu uncusu zimmînin husûsu kādı-yı esbak Bekir Efendi zamânında imâret-i âmire ve sekbânlar fırını uncularının fiâtına nizâm verildikde mevâzi‘-i mezkûrenin akçesi pişkin ve pâk olmağla ücret-i nakliyesi kendi taraflarından olmak üzere beher keylinden yedişer buçuk akçe tenzîle râzı ve pâk ekmekçi hâssı vermek şartıyla ta‘ahhüd etmeleriyle kādı-yı sâbık Yusuf Efendi zamânında i‘lâm olunduğu üzere Galata Sarayı dakīki harc-ı hâssa derkenârında olan şurût-ı sâbıkāya aslâ amel ve i‘tibâr olunmayarak ilgā sûretinde imârât sekbânlar dakīki nizâm-ı cedîdi tahtına idhâl ve imârât sekbânları fırını uncuları yedine verilen fermân-ı âlîşâna derc olunmağla mesfûrun defteri bâlâsına nizâm-ı cedîd mûcebince si‘rı vaz‘ oluna deyü buyrulduğuna binâen nizâm-ı cedîd-i merkūm üzere bi’t-tenzîl fî vaz‘ına mübâderet olundukda mesfûr dahi tefâvüt-i fiâtdan ve masârıf-ı nakliyeden mutazarrır olurum deyü istirhâmı i‘lâm olunmağla bu def‘a Şehremini Efendi’nin i‘lâmından istinbât olunduğu vech üzere nizâm-ı cedîd-i merkūma amel ve i‘tibâr olunmayıp harc-ı hâssa şurût ve ta‘ahhüdü üzere beher keylinde beşer akçe ücret-i kayık ve hammâliye zam ve ba‘dehû üçer sağ akçeleri aşağı varılmak üzere ve cânib-i mîrîye ve âhara gadrı mûcib olmayacak vechile fî vaz‘ olunmasını sa‘âdetlü defterdâr efendi hazretleri telhîs ve bu dâ‘îlerine hitâben fermân-ı âlîleri vârid olup lâkin fi’l-asl saray-ı merkūma hâs envâ‘ından hangisi tahsîs olunduğu sicillâtda mukayyed olmamağla eğer simitçi hâssından mu‘ayyen ise ekmekçi hâssı fîsi vaz‘ olunsa zimmî-yi mesfûra gadr ve saray-ı merkūmda olan gılmân ve hüddâm-ı sâirenin nizâm-ı akvâtına halel gelmesi zâhir olup hilâfında dahi taraf-ı mîrîye hasâret ihtimâli olmağla kaçar akçeden fî vaz‘ıyla mahsûb olduğunun sâbıkları mahâllinden derkenâr olunursa fiât-ı merkūme defter-i es‘ârda her vakte göre envâ‘ hâssa ta‘yîn olunan narha tatbîk ve hangi hâsdan olduğu zâhir oldukdan sonra el-yevm iktizâ eden dahi vaz‘ olunacağı ma‘lûm-ı devletleri buyruldukda emr ü fermân hazret-i men-lehü’l-emrindir. Fî 4 min-Ramazani’l-mübârek sene 1179.