İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 483 Hüküm no: 606 Orijinal metin no: [252-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süpürücüler yiğitbaşılığı iddiasında bulunan Ali tarafından süpürgesi elinden alınan Mehmed’in süpürgesinin geri verilmesi Ocak süpürücülük kethüdâlığı da‘vâ eden Ali’den âlât, Ma‘rûz, Langa’da sâkin arzuhâl eden Halil meclis-i şer‘-i şerîfe ihzâr eylediği Kayseriyeli Mehmed mahzarında ben ocak süpürücü olup kendi kârımla meşgūl iken mezbûr Mehmed yiğitbaşılık ve gāib ani’l-meclis Ali nâm kimesne kethüdâlık iddi‘âsıyla beni ahz ve bize yirmi beş otuz guruş vermedikçe sana [253] ocak süpürtmeyiz deyü mi‘mâr kapısına götürüp süpürgemi ahz ve beni kesbimden men‘ eylediler deyü teşekkî eyledikde mezbûr Mehmed dahi cevâbında biz yirmi bir nefer ocak süpürücü olup ve ziyâde olmamak üzere beynimizde nizâm ve ittifâkımız ile kethüdâ ve yiğitbaşı nasb ve mi‘mâr ağadan bu minvâl üzere tezkire dahi alıp mezbûr Halil içimizden olmayıp berrânî olmağla merkūmu refîklerimiz ahz ve mi‘mâr kapısına ihzâr etmekle kā‘idemiz üzere âlâtı yedinden ahz ve nez‘ olunup ve hâlâ âlâtı mi‘mâr kapısındadır deyü takrîr etmekle ve mûcibiyle süpürgesi mahâllinden mezbûra teslîm iktizâ eylediği ma‘lûm-ı devletleri buyruldukda huzûr-ı âlîlerine i‘lâm olundu. Fî 11 N sene [1]179.