İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 483 Hüküm no: 605 Orijinal metin no: [252-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahalle bekçilerinin bekçilik görevleri yanında ücretli olarak baca temizliği de yapabilmelerine izin verilmesi Bekçiler ocak süpürmek için izn-i fermân Bâ-sah, İstanbul kādısı fazîletlü efendi, Ocaklarda hâsıl olan kurumları izâle için birkaç seneden beru ocak süpürücü nâmıyla birkaç kimesneler zuhûr ve âlât-ı mahsûsa ile esvâk-ı şehri geşt ü güzâr ve ibâdullaha bâ‘is-i rahat olmuşlar idi. Ancak bu esnâda içlerinden ba‘zıları müstakil bir hirfet olmak dâ‘iyesine düşüp kimi kethüdâ ve kimi yiğitbaşı nâmını ittihâz ve san‘atlarını mechûlü’l-ahvâl kimesnelere tahsîs ve kendü kendilerine her ocağa on beşer yirmişer para vaz‘ ile fukarâyı ızrâr ve ekser-i nâsı istiksâr etmeleriyle ocakların süpürtmede ihmâl eylediklerine binâen taht-ı zâbıtaya ifrâğı lâbüd ve öteden beri her mahâllenin bekçileri ahâlî-i mahâllenin mu‘temedi olup ve san‘at-ı merkūme dahi dirâyet ve ta‘allüme mevkūf umûrdan olmamağla mezbûrların kesb-i merkūmlarına mümâna‘at olunmayıp murâd eden kimesneler onlara süpürtmek ve bekçiler dahi onlara ta‘arruz etmemek ve beynlerinde kethüdâ ve yiğitbaşı nasbı misillü muhdesâtdan ve vech-i i‘tidâlden ziyâde ücret talebinden ictinâb eylemek şartıyla mezbûrlar men‘ olunmayıp ve teshîlen li’l-ib‘âd onlara dahi mahsûs olmayıp her mahâllenin bekçisi âlât-ı merkūmeyi tedârik ve ancak mahâllesinde olan odalar makūlesi ve sâir fukarâ hânelerinin ve dükkânların ocaklarından birer para ve ikişer üçer kat hânelerin sagīr ocaklarından ikişer para ve matbâh ocaklarından beşer ve kebîr battal kibâr matbâhı ocaklarından onar para ahz olunup ziyâde taleb edenler mahâlle bekçilerinden ihrâç ve san‘at-ı mezbûre inzimâmıyla bekçiliği âhara verilip gedik iddi‘âsında olmaları mesmû‘ olmayacağı mezkûrlara ifâde ve tefhîm için eimme-i mahâllâtı getirip tenbîh ve te’kîd eyleyesin. Fî 6 N sene 1179.