İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 482 Hüküm no: 604 Orijinal metin no: [251-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. At hamallarının yüklerini boşalttıktan sonra dönüşlerinde hayvana binmemeleri için ferman Hamallar avdette bargirlere binmemek için sâdır olan fermân Sah, İstanbul Kādısı fazîletlü efendi Mahmiye-i İstanbul’da at hamalları ve sâir bargir ile hamûle nakleden makūleler yüklerini mahâllerine götürüp avdetlerinde binmemek için semerleri üzerlerine yarım vakiye demirden mismârlar vaz‘ı öteden beri nizâmlarından iken biraz müddetden beri ba‘zıları terk ve ba‘zıları sagīr enserler vaz‘ ve üzerine ağaçlar koyup bargir sâhibleri sürücülerine iğmâz ile bargirlere binip şiddetle sevk ve önlerine gelen sıbyân ve nisvân ve a‘mâ ve aceze makūlelerine dokunup ızrârdan hâlî olmamalarıyla [252] bundan akdem bi’d-defa‘ât tenbîh olunmuş iken mütenebbih olmamalarıyla taht-ı zâbıtaya ifrâğı lâbüd olmağın imdi hamallar kethüdâsı ve yiğitbaşılarını getirdip kemâ-fi’l-evvel yarım vakiye demirden mismâr vaz‘ ve üzerine ağaç komayıp avdetde binmemek üzere bargir sâhiblerine ve sürücüler dahi yederek getirip ensesinden şiddet ile sürmemek üzere tenbîh-i ekîd ile nizâm-ı kaviyeye rabt ve verilen nizâmı i‘lâm eyleyesin deyü [buyruldu]. Fî 5 N sene 1179.