İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 481 Hüküm no: 603 Orijinal metin no: [251-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağlıkçı Mehmed Vakfı mütevellisi Hafize Hanım’ın vefat eden Ümmügülsüm Hatun’un varisleri aleyhindeki menzil davasından men olunması Çırçır kurbünde vâki‘ Yağlıkçı Vakfı’ndan nizâ‘-ı menzil Ma‘rûz, Mahmiye-i İslambol’da nezâret-i dâ‘îlerinde olan evkāfdan Çırçır kurbünde el-Hâc Hasan mahâllesinde vâki‘ Yağlıkçı Mehmed Vakfı’nın hâlâ mütevellîsi olan mu‘arrefetü’z-zât sâhibe-i arzuhâl Hafize meclis-i şer‘-i enverde mahâlle-i mezbûrede vâki‘ etrâf-ı erba‘ası Süleyman Çelebi ve Âişe Hatun menzilleri ve Şeyhülislâm merhûm Esad Efendi bahçesi ve tarîk-i âm ile mahdûd fevkānî ve tahtânî üç bâb oda ve iki sofayı müştemil menzile vâzı‘atü’l-yed iken bir buçuk ay mukaddem vefât eden Ümmügülsüm bt. Hasan nâm hatunun verese-i münhasırası li-ebin karındaşları Ömer ve Hasan nâm sagīrler ile li-ümmin kebîre karındaşı olup hâlâ Ladik kasabasında sâkine İsmihan taraflarından vasî ve li-ebin diğer kebîre kız karındaşı Emine tarafından husûs-ı âti’l-beyanda vekîl olan el-Hâc Ali b. Osman mahzarında işbu yedimde olan hüccet mantûkunca menzil-i mezkûrun binâ ile meşgūle olan arsası mütevellîyesi olduğum Yağlıkçı Mehmed Vakfı’ndan senevî yedi yüz yirmi akçe icâre ile üzerinde olan ebniyesi mülk olmak üzere zabt olunagelip menzil-i mezkûr mezbûre Ümmügülsüm’ün yedine geçdikden sonra ebniye-i sâbıkāsı bi’l-külliye muhterik oldukda müteveffâ-yı mezbûre Ümmügülsüm arsa-i mezkûre üzerine benim izn-i rizâm yoğiken hâlâ mevcûd olan ebniye-i mezkûresini binâ ve ihdâs edip ben râzıye olmamamla kal‘ını murâd ederken vefât etmekle hâlâ kal‘ olunması bi’t-tevliye matlûbumdur deyü da‘vâ ve mezbûr el-Hâc Ali cevâbında menzil-i mezkûrun ebniye-i sâbıkāsı muhterik oldukda müteveffâ-yı mezbûre Ümmügülsüm hâlâ ebniye-i mevcûdeyi malından zevc-i müteveffâ el-Hâc Osman nâm kimesne ile müşterek olmak üzere binâ murâd etdikde işbu yedimizde olup mütevellîye-i mezbûrenin hatemini hâvî izin temessükü mantûkunca bin yüzyetmiş senesi Cemâziyelâhiresinde mütevellîye-i mezbûre Hafize mülk olmak üzere bi’t-tevliye izin vermekle müteveffâ-yı mezbûre dahi binâ ve on beş gün sonra zevc-i mezbûr el-Hâc Osman menzil-i mezkûrun nısfına isâbet eden semenini zevcesi mezbûreye edâ edemeyip hisse-i şâyi‘ini verdim deyü temessük-i mezkûrun kenârına mütevellîye-i mezkûre şerh vermekle müstakillen mülkü olduğu hâlde vefât edip verese-i mezbûrûna irs ile intikāl eyledi deyü ba‘de’d-def‘ ve’l-inkâr mezbûr el-Hâc Ali def‘-i meşrûhunu udûlden mahâlle-i mezbûrede sâkin Süleyman b. Abdullah ve Halil Odabaşı b. Halil nâm kimesneler şehâdetleriyle isbât etmeğin mûcebiyle mütevellîye-i mezbûre Hafize binâ-yı mezkûr için bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 7 min-Ramazan sene 1179.