İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 480 Hüküm no: 602 Orijinal metin no: [250-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Mustafa Paşa Vakfı’ndan olan Hocapaşa’daki elli altı menzilin hepsini Hocapaşa mahallesine tabi olduğundan bekçilerinin bir olması Hocapaşa mahâllesi nizâ‘ı Ma‘rûz, Derûn-ı arzuhâlde izzetlü defterdâr efendi dâ‘îlerinin arzında münderic mahâlle imamları husûs-ı Hocapaşa mahâllesi imamının âhar arzuhâlinde sâdır olan fermân-ı âlîlerine imtisâlen bundan akdem rü’yet olunup Hocapaşa mahâllesinde merhûm Kara Mustafa Paşa’nın elli altı bâb vakıf menâzili için başka mahâlle olmak üzere kaydı olmağla başka mahâlle irâdesiyle tecdîd ve tahsîs emrinde merhûm-ı müşârün-ileyhin mescidi imamı olan arzuhâlde mezkûr Hâfız Halil mu‘ârazadan men‘ ve Hocapaşa imamına dahi menâzil-i mezkûre mutasarrıflarından rızâlarıyla mescid-i mezkûr imâmetini ihtiyâr edenlere mücerred Hocapaşa mahâllesidir deyü müdâhale etmemek üzere ba‘de’t-tenbîh menâzil-i mevkūfe-i mezkûre mutasarrıflarının ba‘zıları Mustafa Paşa imâmeti ihtiyâr etmeleri sâirlerine sirâyet etmemekle rızâları olmadıkça sâirlerine dahi mücerred müstecir-i vakf-ı mezkûrsun deyü müdâhale etmemek üzere mezbûr Halil’e tenbîh olunup arzuhâl-i mezkûr hâmişine mufassalan i‘lâm olunmuş idi. Husûs-ı mezkûr mahâllinde terâfu‘ ve muktezâsı i‘lâm olunmak bâbında bu def‘a sâdır olan fermân-ı âlîlerine imtisâlen kıbel-i şer‘-i şerîfden Başkâtib Hâfız Mehmed Efendi dâ‘îleri irsâl ol dahi zikr olunan Hocapaşa mahâllesine varıp akdeylediği meclis-i şer‘-i şerîfde sâhib-i arzuhâl Hocapaşa İmamı Hasan Efendi mescid-i mezkûr İmamı mezbûr Halil mahzarında mezbûr Halil bundan akdem tenbîh olunduğu üzere mütenebbih olmayıp menâzil-i mezkûru başka mahâlle etmek irâdesiyle mütevellîsi arzıyla işbu derkenâr olunduğu vech üzere kaleminden müsvedde ile fermân ısdâr ve menâzil-i mezkûr için isticâr olunan bekçisi Hocapaşa mahâllesi ahâlîsinin rızâları yoğiken Hocapaşa mahâllesinde gezdirip bu vechile Hocapaşa mahâllesi ahâlîsine müdâhale eder deyü teşekkî ve hakīkat-i hâl minvâl-i meşrûh üzere olduğunu gerek Hocapaşa mahâllesi ve gerek menâzil-i mezkûre mutasarrıflarından vukūfu olan mazbûtü’l-esâmi Müslimîn ihbâr ve fermân-ı âlîşâna nazar eylediklerinde mazmûn-ı münîfinde başka mahâlle kaydı olmayıp lâkin mütevellî inhâsıyla imam-ı mezbûrun bu misillü fermân-ı âlîşân ısdârı ve başka bekçi isticârı nizâ‘larının adem-i inkıtâ‘ına bâ‘is ve öteden beri Hocapaşa mahâllesi bekçisi kâfî ve vâfî ve emînleri olmağla merkūmûn mezbûr bekçinin hüsn-i hâlini beyan ve nefsine kefil olmalarıyla kat‘-ı nizâ‘ için isticâr etdikleri başka bekçiyi terk ve imam-ı mezbûrun ısdâr eylediği fermânın dahi kaydı terkīn olunmak ricâsında olduklarını mezbûr dâ‘îleri mahâllinde tahrîr ve meclis-i şer‘e gelip inhâ eylediği ma‘lûm-ı devletleri buyruldukda emr ü fermân men-lehü’l-emrindir. Fî 24 min-Ş sene 1179.