İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 479 Hüküm no: 601 Orijinal metin no: [249-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in, vakıf menzil hissesi hakkında Nimetullah ve İbrahim aleyhinde dava açmaya hakkı olmadığı Arsanın da‘vâsı mütevellînin da‘vâsına tevakkuf eder. Ma‘rûz, Mahmiye-i İstanbul’da nezâret-i dâ‘îlerinde olan evkāfdan Teberdâr Kasım Vakfı’ndan olmak üzere zikri âtî menzilin binâsından hisse-i şâyi‘a iddi‘â eden Mehmed meclis-i şer‘-i enverde bundan akdem vefât eden Âmine nâm hatunun kızı mu‘arrefetü’z-zât Nimetullah ile usûbet-i nesebiye cihetinden vârisi olmağla menzil-i mezkûra mülkiyet üzere vaz‘-ı yedi [250] mütehakkık olan İbrahim mahzarında mahmiye-i mezbûrede Cibâli kurbünde Üskübî mahâllesinde vâki‘ bir tarafdan mekteb ve bir tarafdan Çörekçi Halil menzili ve iki tarafdan tarîk-i âm ile mahdûd büyût-ı adîdeyi müştemil menzilin ebniyesi taraf-ı vakf-ı mezkûrdan dört hisse i‘tibârıyla iki hissesi mezbûre Nimetullah’ın ve bir hissesi kaynım Osman nâm kimesnenin ve bir hissesi dahi oğlum diğer Mehmed’in ferâğından benim üzerimde iken altmış dokuz senesinde muhterik oldukda mezbûrânın mûriseleri ve benim kayınvâlidem olan mezbûre Âmine hâlâ mevcûde olan ebniyesini malından vakf-ı mezkûre teberru‘an binâ ve benim bir hissem dahi dâhil olmağla mezbûrân İbrahim ve Nimetullah ebniye-i mezkûreden benim hisseme fuzûlî vaz‘-ı yed ederler deyü da‘vâ ve mezbûrân cevâblarında mûrisemiz mezbûre Âmine ebniye-i mezkûreyi ba‘de’l-harîk nefsi için mülkü olmak üzere binâ ve vefâtından sonra bize mevrûs olup hattâ mezbûr Mehmed geçen sene Ramazan’ında vech-i meşrûh üzere ebniye-i mezkûre-i mevcûdeyi mezbûre Emine vakfa teberru‘an binâ eyledi deyü hissesini bizden da‘vâ ve ol vakitde müdde‘âsını isbâta kādir olmamış idi deyü bir kıt‘a i‘lâm ibrâz edip lâkin mezbûr Mehmed bu sûretde mezbûrâna ebniye-i mezkûre da‘vâsında hasm-ı şer‘î olmayıp husûs-ı mezkûr vakf-ı mezbûr mütevellîsinin da‘vâsına tevakkuf eylediği bi’l-iltimâs huzûr-ı âlîlerine i‘lâm olundu. Fî 5 min-Ramazani’l-mübârek sene 1179.