İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 479 Hüküm no: 600 Orijinal metin no: [249-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamal Bekir’in bir daha İstanbul’a gelmemek şartıyla hapisten çıkarılması Hamal Bekir’in vilâyete gitmek üzere ta‘ahhüdü Ma‘rûz, Çarşamba günü huzûr-ı âlîlerinde ma‘kūd meclis-i şer‘-i şerîfe havâle buyrulan derûn-ı takrîrde mezkûr Hamal Bekir’in da‘vâcısı Balkapanı tüccârından el-Hâc Ali mezbûr Bekir mahzarında işbu sene Receb-i şerîfi’nin yirmi birinci günü vakt-i subhda mezbûr Bekir malımdan Hasırcılar sokağında olan altmış guruş kıymetli üç fıçı aselimi mahâll-i merkūmdan kaldırıp ve istihlâk etmekle tazmîn olunmak matlûbumdur deyü da‘vâ ol dahi inkâr etmekle şâhide havâle olunmuş idi. Mezbûr el-Hâc Ali târîh-i i‘lâm günü mezbûr Bekir’i Subaşı kethüdâsı ile mahbûsen dâ‘îhâneye ihzâr ve muvâcehesinde ityân-ı beyyineden izhâr-ı aczile da‘vâmdan fâriğ oldum deyü hakk-ı şer‘îsini iskāt etmekle mezbûr Bekir’in nîk ü bed ahvâline ilm-i şer‘î lâhık olacak kadar bir habere ıttılâ‘ dahi hâsıl olmamağla mezbûr Bekir beş güne dek vilâyeti olan Kastamonu kazâsında Muşkara nâm karyeye gidip bir dahi İslambol’a gelmemek üzere ta‘ahhüd ve bu minvâl üzere beş güne dek azîmetine ve bir dahi gelmemek üzere nefsine gümrük hamallarından Ali b. İbrahim ve İbrahim b. Mehmed kefil ve onlara dahi Kapan-ı mezkûrun meşâhir tüccârından Alemdar el-Hâc Ahmed b. Musa kefil oldukları ma‘lûm-ı devletleri buyruldukda mezbûr Bekir’in hapisden ıtlâkı husûsu re’y-i âlîlerine ihâle birle vâki‘ hâl huzûr-ı âlîlerine i‘lâm olundu. Fî 5 Ramazan sene 1179.