İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 490 Hüküm no: 615 Orijinal metin no: [257-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Ayasofya civarında kasap olan İbrahim’in ihdas etmiş olduğu kesimhaneyi kapatması Küçük Ayasofya kurbünde ihdâs olunan salhâneyi sedde ta‘ahhüd Ma‘rûz, Mahmiye-i İstanbul’da Küçük Ayasofya kurbünde Hüseyin Ağa mahâllesi İmamı Abdülkadir ve ahâlîsinden Hasan Ağa ve el-Hâc Mustafa ve es-Seyyid Mehmed ve Hüseyin Çelebi ve Ahmed ve Müezzin Molla Ali ve Mustafa Ağa ve İshak Ağa ve Osman Efendi ve el-Hâc Musa ve Ömer Ağa ve Ahmed ve Molla Mehmed meclis-i şer‘-i hatîrde Küçük Ayasofya kurbünde kasab olan İbrahim b. Bekir mahzarında mezbûr İbrahim kolluk karşısında Müezzin Vakfı olan ma‘lûmü’l-hudûd arsada hilâf-ı mu‘tâd mahâlle içinde bir salhâne binâ ve ihdâs ve koyun zebh etmekle râyihâ-i kerîhasından müteezzî olduğumuzdan mâ‘adâ içinde kanaracı zimmîler sâkin olmağla emniyetimiz yokdur deyü men‘ olunmasını iltimâs eylediklerinde mezbûr İbrahim cevâbında ber-vech-i muharrer mahâll-i mezkûrda hilâf-ı [258] mu‘tâd salhâne ihdâs ve cîrânı müteezzî olduklarını ikrâr ve mûcebiyle men‘i için ba‘de’t-tenbîh mezbûr İbrahim dahi zikr olunan salhâneyi mahâll-i mezkûrdan nakle ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 25 min-Ramazan sene 1179.