İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 490 Hüküm no: 614 Orijinal metin no: [257-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeb taifesinden Kosta’ya olan borcunu ödemesi hususunda Menahim’e tenbih olunması Celeb tâifesi cihet-i havâleden kasabbaşı ağa bazergânından taleb Ma‘rûz, Celeb tâifesinden arzuhâl eden Kosta meclis-i şer‘-i hatîrde derûn-ı arzuhâlde mezkûr Menahim nâm Yahûdîden merkūm Menahim zimmetinde cihet-i havâleden dokuz bin sekiz yüz elli dokuz guruş hakkım olup hattâ merkūm Menahim karzdan olmak üzere işbu Şa‘bân-ı şerîf’in yirmi birinci günü târîhiyle yedime temessük verip ve beş bin guruşunu teslîm ve dört bin sekiz yüz elli dokuz guruşu zimmetinde bâkī kalmağla hâlâ taleb ederim deyü ba‘de’d-da‘vâ ve’l-istintâk mezbûr Menahim cevâbında müdde‘î-i merkūm Kosta’nın şerîkleriyle hâlâ Kasabbaşı Ali Ağa zimmetinde koyun semeninden dokuz bin sekiz yüz elli dokuz guruş alacak hakları olup mütâlebe etmeleriyle ben dahi iş bitsin deyü meblağ-ı mezkûru üzerime alıp temessük-i mezkûru karz olmak üzere vermişdim. Lâkin kasabbaşıdan ve müdde‘î-i mezbûrdan akçe almadım bana gadr olur deyü eylediği def‘i mesmû‘a olmamağla ikrârı mûcebince meblağ-ı bâkī dört bin sekiz yüz elli dokuz guruşun edâsıyla merkūm Menahim şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 25 min-Ramazan sene [1]179.