İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 489 Hüküm no: 613 Orijinal metin no: [257-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpekçi esnafından izinsiz dükkân açan Kirkor’un dükkânı kapatmak için taahhütte bulunması Kazzâz tâifesinden dükkân ihdâs eden fâriğ olmağa ta‘ahhüd Ma‘rûz, Mahmiye-i İstanbul’da vâki‘ kazzâz tâifesinden arzuhâl eden kethüdâları Süleyman ve Yiğitbaşı vekîli diğer Süleyman, ustalarından Yahya ve Mehmed ve Ali ve zimmî ustalarından Kevork ve diğer Kevork ve Artin ve Karabet ve Agob ve Bağdisar tâife-i mezbûreden meclis-i şer‘-i şerîfe ihzâr eyledikleri derûn-ı arzuhâlde mezkûr Kirkor nâm zimmîden işbu yedimizde olan fermân-ı âlîşân mûcebince mahâlleri ma‘lûm dükkânlarımız iki yüz beş dükkân olup kâfî ve vâfî iken ziyâde ihdâs olunmaya deyü tasrîh olunmuş iken mezbûr Kirkor Aksaray’da Murad Paşa Câmi‘i karşısında bir kepenk dükkân isticâr ve içinde kazzâz metâ‘ı koyup ta‘dâd olunan dükkândan ziyâde hilâf-ı fermân-ı âlîşân dükkân ihdâs murâd eder deyü teşekkî ve nizâ‘ esnâsında beynleri musâfât kılınıp merkūm Kirkor’un dükkân ta‘mîri için malından sarf eylediği otuz guruşu kethüdâ mezbûr Süleyman teberru‘an merkūm Kirkor’a verip ve bu dükkân tahliye oluncaya kadar dükkânda ikāmet veyâhud ustalarından birinin yanına gitmek üzere ta‘ahhüd etdikde merkūm Kirkor dahi râzı olup hilâf-ı fermân-ı âlîşân dükkân ihdâsından fâriğ olmağla bu minvâl üzere kat‘-ı nizâ‘ eyledikleri mübâşiri iltimâsıyla huzûr-ı âlîlerine i‘lâm olundu. Fî 22 min-Ramazan sene 1179.