İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 488 Hüküm no: 612 Orijinal metin no: [256-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takor v. Arzuman’ın Avanis v. Bogos aleyhindeki vakıf menzil hissesi davasında anlaşma sağlanması Samatya’da Ayanikola nâm kilise vakfından nizâ‘-ı menzil Ma‘rûz, Mahmiye-i İstanbul’da Hammâmî Muhyiddin mahâllesinde mütemekkine iken bundan akdem hâlike olan Lusik bt. Bedros nâm Nasrâniyenin sadrî oğlu olup arzuhâl eden Takor v. Arzuman’ın iddi‘â-yı rüşd ve bülûğunu zâhir-i hâlinde sin ve cüssesi mükezzib olmağla da‘vâ-i âtiyesine vasî nasb olunan Avanis v. Serupos mahmiye-i mezkûrede meclis-i şer‘-i hatîrde Samatya’da Ayanikola nâm kilise fukarâsı vakfından olup mahâlle-i mezbûrede vâki‘ etrâf-ı erba‘ası hâlike-i merkūmenin âhar menzili ve dam ve Markarina nâm zevcânın müşterek menzilleri ve Meryem nâm Nasrâniye arsası ve tarîk-i âm ile mahdûd menzile bâ-re’y-i mütevellî kat‘â ferâğ ile vâzı‘ü’l-yed olan Avanis v. Bogos muvâcehesinde vakf-ı mezkûr mütevellîsi hâzır olduğu hâlde menzil-i mezkûrun nısf-ı şâyi‘ini merkūm Arzuman üzerinde ve nısf-ı dahi hâlike-i merkūme Lusik üzerinde iken yetmiş bir senesi Cemâziyelâhiresi’nin dokuzuncu günü târîhinde hâlike merkūme Lusik zevci merkūm ile ma‘an hâzır bi’l-meclis arzuhâlde mezkûr Kolancı Dolet nâm zimmîden istidâne eyledikleri dört yüz guruş mukābelesinde ferâğ-ı bi’l-vefâ tarîkiyle ferâğ ve mütevellî temessüküne kat‘â tahrîr etdirmeleriyle merkūm Dolet dahi bir sene sonra Ramazan-ı şerîfin on beşinde vâzı‘ü’l-yed olan işbu mesfûr Avanis’e bâ-re’y-i mütevellî kat‘â ferâğ etmiş idi. Şimdi merkūm Lusik hâlike olup menzil-i mezkûrun nısf-ı şâyi‘i vasîsi olduğum oğlu merkūm Takor’a âdiyen intikāl etmekle ve ben mezkûrdan hâlike-i merkūmenin hissesini edâ ve fekk-i ferâğ ile nısf-ı şâyi‘-i merkūmu bi’l-vesâye taleb ederim deyü iddi‘â ve merkūm Avanis dahi cevâbında hâlike-i merkūme Lusik’in nısf-ı şâyi‘-i merkūmu târîh-i merkūmda mesfûr Dolet’e kat‘â ferâğ ve nısf-ı şâyi‘-i merkūme müte‘allıka da‘vâdan merkūm Dolet’in zimmetini ibrâ ve iskāt [257] etmiş idi deyü def‘ini isbât esnâsında merkūm Avanis bi-tarîkı’s-sulh malından sagīr-i merkūma elli guruş verip ferâğ bi’l-vefâ da‘vâsından sagīr-i mezbûrun zimmetini ibrâ etdikde vasiyy-i merkūm dahi nef‘an li’s-sagīr meblağ-ı mezkûr elli guruşu sagīr-i merkūm için ahz u kabz ve menzil-i mezkûrun nısf-ı şâyi‘i için ferâğ bi’l-vefâ da‘vâsından merkūm Avanis’in zimmetini ibrâ ve iskāt ve bu vechile kat‘-ı münâza‘a eyledikleri tescîl olunup mübâşiri çavuş kulları iltimâsıyla huzûr-ı âlîlerine i‘lâm olundu. Fî 22 min-Ramazan sene 1179.