İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 488 Hüküm no: 611 Orijinal metin no: [256-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koçu arabacılarının belirlenen ücretten fazla ücret almamalarının bildirilmesi Koçu Arabacıları narhına ve nizâmına müte‘allık fermân Bâ-sah İstanbul kādısı fazîletlü efendi ve izzetlü yeniçeri ağası Âsitâne-i aliyye’de vâki‘ Koçu arabacıları tâifesi bundan akdem ziyâde ücret talebiyle ibâdullahı ta‘cîz ve tecrîm etmeleriyle tâife-i merkūmenin kethüdâ ve yiğitbaşı ve ustaları ma‘rifetleriyle bir re’s koçu arabası için Bahçekapısı’nda Yedikule ve Eyyûb Ensârî ve Sultân Mehmed ve Aksaray ve sâir her ne mahâlle olur ise bırakmalı? ta‘bîr olunur ücreti ancak otuz paraya ve tamâm bir gün isticâr olunduğu hâlde bir günlük ücreti dahi altmış paraya olmak üzere yetmiş altı târîhinde vech-i meşrûh üzere verilen nizâmı cümlesi kabûl edip ziyâde ücret talebiyle ibâdullahı ta‘cîz etmemek üzere her biri âhara ve kethüdâları dahi cümlesine kefil olmuşlar iken tâife-i merkūmûnun bu esnâda ta‘ahhüdlerinin hilâfı harekete cesâret ile dört ve beş guruş ücret talebiyle nâsı ta‘cîz eyledikleri mesmû‘ olup men‘ ü def‘i lâzım ve lâbüd olmağla imdi tâife-i merkūmûnun kethüdâlar ve yiğitbaşıları ve ihtiyâr ustalarına mukaddemâ ta‘ahhüdleri üzere bırakma ücretleri otuz paraya ve günlük ücretleri altmış paraya olup bundan böyle ta‘ahhüdlerinden ziyâde akçe talebiyle kimesneye rencîde etmeleri lâzım gelir ise muâhaze ve te’dîb olunacakları tefhîm ile ta‘ahhüdlerinde bir akçe ziyâde ücret taleb etmemeleri husûsunu dikkat ve ihtimâm ile nizâm-ı kavîye rabt eyleyeler deyü [buyruldu]. Fî 19 N sene 1179.