İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 486 Hüküm no: 610 Orijinal metin no: [254-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Mustafa Paşa mahallesi ismiyle bir mahalle olmadığından Mescid İmamı Halil’in elindeki ferman kaydının silinmesi ve mahallenin Hocapaşa’ya bağlı olduğunun tesbiti Hocapaşa İmamı’na verilen fermân Akzâ kuzâti’l-müslimîn evlâ vülâti’l-müvahhidîn ma‘denü’l-fazl ve’l-yakīn râfi‘u i‘lâmü’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în Mevlânâ İstanbul kādısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki kazâ-i mezbûre tâbi Hocapaşa mahâllesinde vâki‘ Hocapaşa Câmi‘-i şerîfi imamı kudvetü’s-sülehâi’s-sâlikîn Hâfız Hasan -zîde salâhuhû- dîvân-ı hümâyûnuma arzuhâl edip mahâlle-i mezbûre ahâlîleri beynlerinde vâki‘ olan akd-i enkiha ve gasl-i mevti ve sâir eimmeye dâir umûr ve husûsların ecdâd ve eslâfları gibi kānûn-ı kadîm üzere rü’yet edegelip âhardan müdâhale iktizâ etmez iken bundan akdem mahâlle-i mezbûrenin derûnuna merhûm Kara Mustafa Paşa üç vakit edâ-yı salât için mescid binâ ve ihdâs ve etrâfından müte‘addid mülk menâzil iştirâ ve mescidine vakıf edip lâkin hîn-i tahrîrden beri menâzil-i merkūmenin vukū‘u Hocapaşa mahâllesinde olduğu nümâyân ve vakf-ı mezbûrun tarafından verilen temessükâtda dahi Hocapaşa mahâllesi tasrîhiyle musarrah olup ve bundan akdem mescid-i mezbûr imamı Molla Mustafa nâm kimesne ba‘zı muharrik makūlesinin tahrîkiyle mahâlle-i mezbûre Ali Kacır ismiyle müsemmâ ve müstakil mahâlledir ve eimmeye dâir umûr ve husûsların ben rü’yet eylerim deyü iddi‘â edip [255] ve Hocapaşa ve ittisâlinde Elvanoğlu ve Hobyar ve Karagöz mahâllelerinin tasrîhi hâne-i avârıza bağlı olmağla Ali Kacır mahâllesi kaydı olmadığı nümâyân oldukda merkūm Mustafa’nın bî-vech müdâhalesi men‘ ü def‘ birle mezbûr Hâfız Hasan’ın yedine emr-i âlîşân i‘tâ olundukda merkūm Molla Mustafa imâmet cihetini Molla Halil’e ferâgat edip bu esnâda Molla Halil dahi zuhûr ve mücerred menâzil-i merkūm mescid-i mezbûr musakkafâtından olmak hasebiyle Kara Mustafa Paşa mahâllesi deyü tesmiye ve zabt ederim deyü tekdîr murâd eyledikde terâfu‘-i şer‘ ve mezbûr Halil’in mahâllesi olmadığı sâbit ve i‘lâm-ı şer‘iyye olunup mu‘ârazası men‘ olunmuş iken yine itâ‘at etmeyip vakf-ı merkūm kāimmakām-ı mütevellîden arz ve mûcebince yedine emr-i âlîşânım verilmekle ve mezbûr Halil’in aldığı emrin kaydı ref‘ ü terkīn olunmak ricâsına istid‘â etmeğin Hocapaşa Mahâllesi ahâlîsinin âhar arzuhâlinde sâdır olan fermân-ı âlîlerine imtisâlen bundan akdem rü’yet olunup mahâlle-i mezbûrede merhûm Kara Mustafa Paşa’nın elli altı bâb vakıf menzili için başka mahâlle olmak üzere kaydı olmamağla başka mahâlle irâdesiyle tahrîr ve tahsîs emrinde merhûm-ı müşârün-ileyhin mescidi imamı olan mezkûr Hâfız Halil mu‘ârazadan men‘ ve Hocapaşa imamına dahi menâzil-i mezkûr taraflarından rızâsıyla mescid-i mezkûr imamını ihtiyâr edenlere mücerred Hocapaşa mahâllesidir deyü müdâhale etmemek üzere ba‘de’t-tenbîh menâzil-i merkūm mutasarrıflarının ba‘zıları Mustafa Paşa Mescidi imamını ihtiyâr etmeleri sâirlerine sirâyet etmemek ve rızâları olmadıkça sâirlerine dahi mücerred müstecir-i vakf-ı mezkûrsuz deyü müdâhale etmemek üzere mezbûr Halil’e tenbîh olunup arzuhâl-i mezkûr hâmişine mufassalan i‘lâm olunmuş idi. Husûs-ı mezkûr mahâllinde terâfu‘ ve muktezâsı i‘lâm olunmak bâbında bu def‘a sâdır olan telhîs ve fermân-ı âlîlerine imtisâlen kıbel-i şer‘-i şerfden Başkâtib Hâfız Mehmed Emin -zîde ilmühû- Hocapaşa mahâllesine varıp akdeylediği meclis-i şer‘-i şerîfde Hocapaşa İmamı Hasan ve mescid-i mezkûr İmamı Halil mahzarında merkūm Halil bundan akdem tenbîh olunduğu üzere mütenebbih olmayıp menâzil-i mezkûru başka mahâlle etmek irâdesiyle mütevellîsi arzıyla fermân ısdâr ve menâzil-i mezkûr için isticâr olunan bekçisini Hocapaşa mahâllesi ahâlîsinin rızâları yoğiken Hocapaşa mahâllesinde gezdirip bu vechile Hocapaşa mahâllesi ahâlîsine müdâhale eder deyü teşekkî ve hakīkat-i hâl minvâl-i meşrûh üzere olduğunu gerek Hocapaşa mahâllesinde ve gerek menâzil-i merkūm mutasarrıflarından vukū‘u üzere mazbûtü’l-esâmi Müslimîn ihbâr ve fermân-ı âlîşânıma nazar etdiklerinde mazmûn-ı münîfinde başka mahâlle kaydı olmayıp lâkin mütevellî inhâsıyla İmam-ı mezbûrun bu misillü fermân-ı âlîşân ısdârı ve başka bekçi isticârı nizâ‘larının adem-i inkıtâ‘ına bâ‘is ve öteden beri Hocapaşa mahâllesi bekçisi kâfî ve vâfî ve emînleri olmağla merkūmûn mezbûr bekçinin hüsn-i hâlini beyan ve nefsine kefil olmalarıyla kat‘-ı nizâ‘ için isticâr eyledikleri başka bekçiyi terk ve imam-ı mezbûrun ısdâr eylediği fermân-ı âlîşânın kaydı terkīn olunmak ricâsında oldukları mevlânâ-yı mûmâ-ileyh mahâllinde tahrîr ve meclis-i şer‘e inhâ eylediklerin İstanbul kādısı Mehmed Hamid -zîdet fezâiluhû- i‘lâm etmeğin i‘lâmı mûcebince mezbûr Halil’in aldığı emrin kaydı terkīn olunmak üzere mevkūfâtdan Anadolu Muhâsebesine ilmühaber ve emri verilmek bâbında fermân-ı âlîşânım sâdır olmuşdur, buyurdum ki hükm-i şerîfim vardıkda bu bâbda sâdır olan [256] emrim üzere amel edip dahi vech-i meşrûh üzere mevlânâ-yı mûmâ-ileyhin i‘lâmı mûcebince mezbûr Halil’in aldığı emrin kaydı terkīn olunmak üzere ilmühaberi verilmekle mazmûn-ı emr-i şerîfimle âmil olup hilâf-ı emr-i âlîşân mezbûr Halil’i müdâhale ve ta‘arruz etdirmeyesin. Şöyle bilesin alâmet-i şerîfime i‘timâd kılasız. Fî 17 Ramazan sene 1179.