İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 485 Hüküm no: 609 Orijinal metin no: [254-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazer v. Toros’un menzil ve arsasını müştemilatıyla birlikte Duhan Gümrükçüsü Abdülbaki Ağa’ya satması Mahmiye-i İstanbul’da Vâlide Hanı’nda Şobanoğullarından sarrâf olup zikri âtî menzil misillü Müslim menzilleri iştirâ ve yine Müslimîne bey‘ mu‘tâdı olan Kazer v. Toros mahmiye-i mezbûrede meclis-i şer‘-i hatîrde Duhân gümrükçüsü fahrü’l-işbâh Abdülbaki Ağa b. ( ) tarafından vech-i âtî üzere tasdîka vekîl-i şer‘îsi eşrâf-ı kuzâtdan Mehmed Said Efendi b. Abdurrahim Efendi mahzarında ikrâr ve takrîr-i kelâm edip mahmiye-i mezbûrede Sedefçiler ardında Emin Sinan mahâllesinde kâin bir tarafdan ba‘zan Ahmed Bey ve ba‘zan Halil ve Bekir ve Hasan menzilleri ve bir tarafdan tarîk-i hâs ve iki tarafdan tarîk-i âm ile mahdûd ve hâriciye ve dâhiliyede fevkānî ve tahtânî büyût-ı adîde ve câmekân ve hamam ve matbâh ve eşcâr-ı müsmire ve gayr-ı müsmireli bahçe ve hâricen ve dâhilen müştemilât-ı sâire-i ma‘lûmeyi hâvî mâ-i lezîz-i cârîli bir bâb kebîr menzilin ber-mantûk-ı temessükât ma‘lûmü’l-mikdâr mahâlli Salih Efendi ve Selime Hatun ve Şâhî Hatun ve Tuğcu Ahmed Çelebi vakıflarından taht-ı tasarrufumda ve mâ‘adâ bi’l-cümle ebniye ve arsası işbu hüccet-i şer‘iyye nâtıka olduğu üzere yedimde mülk ve hakkım olmağla menzil-i mahdûd-ı mezkûrun bi’l-cümle arsa ve ebniye-i memlûke-i müfreze-i ma‘lûmesini cümle-i tevâbi‘ ve levâhıkı ve kâffe-i hukūk ve merâfıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Abdülbaki Ağa’ya yirmi bin beş yüz guruşa bey‘ ve temlîk ve teslîm ve ber-mantûk-ı temessükât vakıf olan mahâllerini dahi mütevellîleri ma‘rifetleriyle yine mezbûr Abdülbaki Ağa’ya meccânen ferâğ-ı mu‘teber-i kat‘î ile ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semen-i mezkûr yirmi bin beş yüz guruşu müvekkil-i mezbûr yedinden ahz u kabz eyledim, fî-mâ-ba‘d menzil-i mahdûd-ı mezkûrdan mülk olan arsa ve ebniye-i müfrezesi müvekkil-i mezbûr Abdülbaki’nin mülk-i müşterâsı ve hakk-ı sırfı ve vakıf olan mahâlleri dahi dâhil-i havza-i tasarrufu olup benim mecmû‘ menzil-i mahdûd-ı mezkûrda kat‘â alâka ve medhalim kalmamağla menzil-i mebî‘-i mezkûrun tağrîr ve gabnine ve istîfâ da‘vâsına müte‘allıka da‘vâdan her birimiz âharın zimmetini ibrâ ve iskāt ve her birimiz dahi âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 12 min-N sene 1179. Şuhûdü’l-hâl: İmam Mehmed Said Efendi hatîb-i Hisar, Mehmed Çelebi b. Mehmed, Mehmed b. Ahmed, İsmail Çelebi b. Ali, Mehmed Ağa, Ali b. Abdi ve gayruhum.