İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 493 Hüküm no: 619 Orijinal metin no: [259-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayramda kadınların pazarlara çıkmamaları ve mahalle aralarında gezmemeleri Îd fermânı Bâ-sah İstanbul kādısı fazîletlü efendi, Îd-i şerîf-i behcet-redîf eyyâmında nisâ tâifesinin esvâk ve bazar ve mahâllât aralarında geşt ü güzârları bâ-fermân-ı âlî memnû‘âtdan olmağla imdi mahâllât imamlarını meclis-i şer‘e da‘vet ve bi-mennihî te‘âlâ işbu îd-i fıtrın ibtidâsı gününden hitâmı hengâmına dek nisâ tâifesi esvâk-ı pazara çıkmayıp ve mahâllât aralarında gezmeyip büyûtunda ikāmet etdirilmesi husûsunda tenbîh ve eğer îd-i şerîf eyyâmında mugāyir-i fermân-ı âlî harekete cesâret ve esvâk ve mahâllât aralarında geşt ü güzâr ederi olur ise te’dîb olunacakları muhakkak olduğunu mahâlleleri ahâlîlerine imamları ma‘rifetiyle alâ-vechi’t-tehdîd ifâde ve ifhâma mübâderet eyleyesiz deyü [buyruldu]. Fî-selh-i N sene [11]79.