İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 493 Hüküm no: 620 Orijinal metin no: [259-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasabbaşı Ali Ağa ile celepler taifesi arasında koyun alımına dair anlaşmazlığın giderilmesi Kasabbaşı Ağa ile celeb tâifesinin mahâllinden ağnâm iştirâ eylemek nizâ‘ları Ma‘rûz, Sâdır olan fermân-ı âlîlerine imtisâlen Kasabbaşı Ali Ağa kulları muvâcehesinde celeb tâifesinden arzuhâl eden Anton ve İstati ve Tarandafil ve Kiryako ve İstoyan ve İstefan ve Yanaki ve Manço ve Dimitri ve Rizo ve Vasil ve Anderya ve Yorgi ve Tanaş ve Yani ve İzladin ve Mato ve diğer Tanaş nâm zimmîler hâzır oldukları hâlde işbu arzuhâl ve derkenâra nazar olundukda yetmiş sekiz senesi Muharremi evâsıtında celeb tâifesinden Mehmed ile Agarkiri ve Kiryako ve sâir şerîkleri istid‘âsıyla mezbûrûnun Bender ve Hotin ve Tatarlık ve sâir ağnâm mübâya‘ası olunagelen mahâllerden ağnâm iştirâ ve Âsitâne-i aliyye’ye getirmelerine Kasabbaşı-yı hâssa ve âharı taraflarından müdâhale olunmamak bâbında mahâll-i mezkûre zâbitlerine ve Eflak ve Boğdan voyvodalarına hitâben fermân-ı âlîşân sâdır olmuş iken geçen sene Kasabbaşı-yı mezbûrun sayıcıları ol havâlîde bizim koyun iştirâmıza mümâna‘at ve biz almadıkça size aldırmazız, yedimizde fermânımız vardır deyü te’hîr ve mukaddem iştirâ eyleyip yedimizde bulunan koyunumuzu aldığımızdan noksân baha ile elimizden alıp ve sene-i mübârekede Âsitâne-i aliyye’ye getirdiğimiz koyunlardan Kasım Kapısı’nda yüz seksen bin koyun tevzî‘ olunup şimdi fermân-ı âlîşânı tecdîd ve yine ol havâlîde vech-i meşrûh üzere koyun iştirâsına azîmet ve isti‘câl eylediğimizde Kasabbaşı-yı mezbûr sene-i sâbıkā üzere ben dilediğim mikdâr koyun almadıkça size aldırmam deyü bizi te’ehhür ve fermân-ı âlîşânın tecdîd ve infâzına mümâna‘at eder deyü teşekkî etdiklerinde kasabbaşı-yı mezbûr dahi işbu derkenâr olunup mezbûrûnun tecdîdini murâd etdikleri fermân-ı âlîşân Astorakioğlu’nun âdemleri olan mârrü’z-zikr on nefer kimesnelerin istid‘âsıyla olup ve geçen sene mezbûrûna ol havâlîde mümâna‘at eden ol kimesnelerdir, lâkin ben kānûn-ı kadîm üzere mîrî koyunu mahâll-i mezkûreden iştirâ ve itmâm etmedikçe âharlar koyun iştirâ eylemeye deyü fermân-ı âlîşân ısdâr ve olageldiği minvâl üzere sayıcılar ve Acemioğlanları çıkarıp irsâl etmemle mezbûrûn işbu fermân-ı âlîşânı tecdîd etdirdikleri sûretde benim iştirâ ve cem‘ eyleyeceğim mîrî koyunun ta‘tîl ve te’hîrine bâ‘is olur deyü takrîr etmeğin iktizâsı kasabbaşı-yı mezbûrun ısdâr eylediği fermân-ı âlîşân dahi derkenâr ve ikisine dahi nazar olunup mîrî koyunların cem‘inin te’hîrine bâ‘is olmayacak vechile emreyn-i mezkûreynden ibâdullaha enfa‘ olanı tenfîz ve icrâ yâhud celebler yedine tarafeyne muzır olmayacak sûretde bir emr-i âhar ısdârıyla nizâ‘larına faysal verilmek re’y-i âlîlerine menût mevâddan olduğu ma‘lûm-ı devletleri buyruldukda emr ü fermân hazret-i men-lehü’l-emrindir. Fî 26 min-Ramazan sene [11]79.