İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 495 Hüküm no: 622 Orijinal metin no: [260-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoğurtçulara nizam verilmek üzere çağırıldığı halde mahkemeye gelmeyen mandıracıların zorla getirtilmesi Yoğurtçuların nizâmı için gelmeyen zimmîleri ihzâr Ma‘rûz, Sâdır olan fermân-ı âlîye imtisâlen kârhâne yoğurtçularıyla mandıracılar ve koltukçu yoğurtçuların nizâmına mübâşeret olundukda koltukçu yoğurtçular bâ-hatt-ı hümâyûn-ı itâ‘at-makrûn men‘ olunup lâkin mandıracılar müstecir oldukları mandıralarında yoğurt yapıp getirip ibâdullaha bey‘ etmek husûsu kadîm ve ibâdullaha enfa‘ olduğuna binâen kârhâne yoğurtçuları yedinde olan hüccetde atlı sütcülere tahsîs olunan on dokuz mandıra müstecirleri hâlis bostan yoğurdu yapıp ibâdullaha bey‘ etmek müstahsen olup lâkin ba‘zı mandıralar ba‘îd ve yoğurdu beher gün naklolunmak asîr olmağla her biri için mahmiye-i İstanbul’da birer mahâl ta‘yîn ve mahâlli sicille kaydolunup südlerini mandıralarından ol mahâlle nakl ve hâlis bostan yoğurdu işlemek üzere Müderrisköy Mandırası müsteciri Feyzullah’ın südü için Kumkapı Nişâncısı’nda ve yine mezbûrun Ferhadpaşa Mandırası Şehremini’nde ve yine mezbûrun Gümrükçü Çiftliği mandırası Sultân Ahmed Câmi‘-i şerîfi bahçesinde ve yine mezbûrun Küçükköy mandırası Balat’da ve yine mezbûrun Çiço mandırası Akarçeşme’de ve Davudpaşa Nakkaş Paşa Sarayı’nda ve Petos Aksaray’da ve Çavuşbaşı Karagümrük’de ve Pendalhasa? mandırası Yenibahçe’de ve Aypa Kesmekaya’da mahâl ta‘yîn ve bâkī dört mandıra hâlî olmağla hâlâ Hazînedâr Çiftliği’nde Nazkov ve Bedos’da Mato ve Demirkuyu’da Dimo ve Makrihora’da İstefan ve Burgos’da Mihal Çarşamba gününden beri meclis-i şer‘-i şerîfe ihzâr için mübâşirleri Mustafa Çavuş kulları iki üç def‘a irsâl ve bir vechile itâ‘at etmediklerinden mâ‘adâ kârhâne yoğurtçularına ta‘yîn olunan on altı mandıradan dahi ancak dört nefer kimesneler südlerini kârhâne yoğurtçularına vermeğe ta‘ahhüd ve mâ‘adâsının kezâlik ihzâr ve taht-ı nizâma ifrâğı kābil olmamağla adem-i itâ‘atlarının sebebi istihbâr olundukda hâlâ mahbûs olan Piço ile atebe-i aliyyelerine bu gün irsâl olunan karındaşı Dimo gereği gibi te’dîb olmadıkça ihzârları kābil olmayıp yine müsâ‘ade ümîdiyle südümüzü yine koltukçu yoğurtçularına veririz deyü izrâr, lâkin bu makūle koltukçu ta‘bîr olunan tâife cemi‘-i ehl-i hırefin ihtilâline bâdî ve bunlar dahi hatt-ı hümâyûnla müzeyyen emr-i âlîşân ile memnû‘ iken yine ol dâ‘iye ile gelmekden ibâ eyledikleri ma‘lûm-ı devletleri buyruldukda tarafeynden gelmeyen zimmîler izzetlü bostancıbaşı ağa ma‘rifetiyle meclis-i şer‘-i şerîfe ihzâr ve nef‘an li’l-ib‘âd taht-ı nizâma idrâc olunması bâbında emr ü fermân hazret-i me- lehü’l-emrindir. Fî 29 min-N sene 1179.