İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 508 Hüküm no: 641 Orijinal metin no: [266-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimarsinan mahallesi halkından bazı kişileri yaralayan ve serkeşlik yapan Cebeci Osman’ın sürgün edilmesi Cebeci Osman’ın nefyini i‘lâm Ma‘rûz, Mahmiye-i İslambol’da Mimarsinan mahâllesi sâkinlerinden vech-i âtî üzere mecrûh olan Mehmed b. Seyfullah’ın tarafından vekîli anası zâtı mu‘arrefe Rukıye ile mahâlle-i mezbûre İmamı Mehmed Efendi ve Müezzin Molla Hüseyin ve ahâlîsinden Ahmed Efendi ve el-Hâc Mehmed ve Berber Hasan ve Fesçi Süleyman ve Attâr es-Seyyid Bekir ve Ömer Odabaşı ve Çukadâr Ali ve Kahveci Mustafa ve es-Seyyid Mehmed Çarşamba günü arz odasında huzûr-ı âlîde ma‘kūd meclis-i şer‘-i şerîfe ihzâr olunan Cebeci Osman nâm mühtedî mahzarında mezbûr Osman kendi hâlinde olmayıp üç gün mukaddem mezbûr Mehmed’i sol tarafından bıçak ile amden Karaman kurbünde Enserciler sokağında darb ve cerh eylediğini isbât ve bir müddet tevkīf olunduğu Ahiçelebi Mahkemesi’nden i‘lâm olunup bundan akdem işbu hâzır bi’l-meclis Hüseyin nâm kimesne dahi omuzu başından kezâlik darb ve cerh edildiğinden mâ‘adâ yine hâzır bi’l-meclis sâ‘atçi Osman’ın dükkânına varıp dükkânından çık yâhud seni öldürürüm deyü ihâfe ve işbu Ramazan-ı şerîfde dahi gece sâ‘at dörtde Mücellid el-Hâc Mehmed’in dükkânın açmağa mübâşeret eylediği rü’yet olunmuş iken hâlâ ef‘âl-i şenî‘asında ısrâr ve mahâlleyi ateşe verip ba‘zılarını öldürürüm deyü ihâfe ve ızrârdan hâlî olmayıp ve birkaç def‘a te’dîb ve karîb mahâlle nefy olunmuş iken yine mütenebbih olmamağla mezbûrdan bi’l-külliye emniyetimiz meslûb olmuşdur deyü sû-i hâlini ihbâr etmeleriyle eğer yine gelirse cezâsı tertîb olunmak şartıyla bilâd-ı ba‘îdeye neyf ile şer ve mazarrâtı def‘ buyrulmak bâbında emr ü fermân hazret-i men-lehü’l-emrindir. Fî 17 min-Şevvâl sene 1179.