İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 45 Hüküm no: 1 Orijinal metin no: [İç Kapak] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Usta’nın Tahtakale’deki kebapçı ve çörekçi dükkânlarındaki hissesini sattığı A‘lemü’l-ulemâ’i’l-izâm efdalü’l-fudalâi’l-fihâm zahru’l-mevâli’l-kirâm Sa‘âdetlü semâhatlü Mollacıkzâde İshak Efendi hazretlerinin zaman-ı hükûmetlerinde olan vekāyi‘in hüccet sicillidir. Kebabcı Kebabcı esnâfından Ahmed Usta b. Abdullah nâm kimesnenin karındaşı ve tarafından vech-i âtî üzere sâbitü’l-vekâle vekîli olan el-Hâc Hüseyin nâm kimesne meclis-i şer‘-i şerîf-i enverde zâtı ta‘rîf-i şer‘î ile mu‘arrefe olan işbu bâ‘isetü’l-kitâb Zeyneb Hatun bt. Mustafa mahzarında bi’l-vekâle ikrâr-ı tâm ve takrîr-i kelâm edip mahmiye-i İslambol’da Tahtakale sûkunda vâki‘ çörekçi dükkânı derûnunda kırk iki vakıyye evân-ı nuhâs ile beyne’l-hiref gedik ta‘bîr olunur sâir âlât-ı lâzıme-i ma‘lûmenin sülüsü ve yine dükkân-ı mezbûrda mevcûd yüz beş vakıyye evân-ı nuhâsın mecmû‘u ve sûk-ı mezkûrda vâki‘ kebabcı dükkânı derûnunda mevcûd iki yüz on sekiz vakıyye evân-ı nuhâs ile beyne’l-hiref gedik ta‘bîr olunur âlât-ı lâzıme-i ma‘lûmenin kezâlik sekiz sehim i‘tibârıyla üç sehm-i şâyi‘leri karındaşım müvekkilim mezbûr Ahmed Usta’nın bâ-hüccet-i şer‘iye şirâen yedinde mülkü ve beş sehm-i şâyi‘leri mezbûre Zeyneb Hatun’un ırsen ve şirâen yedinde mülkü olmağla zikrolunan çörekçi ve kebabcı dükkânlarında mevcûd evân-ı nuhâs ve sâir âlât-ı lâzıme-i ma‘lûmelerin bâlâda zikrolunduğu vech üzere sülüslerinden i‘tibâr-ı mezkûr ile ben karındaşım müvekkilim mezbûr Ahmed Usta’nın mâlik olduğu üç sehim hisse-i şâyi‘asını tarafeynden îcâb ve kabûlü hâvî şürût-ı müfsideden ârî bey‘-ı kat‘î ve safka-i vâhide ile mezbûre Zeyneb Hatun’a dört yüz yetmiş guruşa bi’l-vekâle bey‘ ve temlîk ve lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezbûr dört yüz yetmiş guruşu mezbûre Zeyneb Hatun yedinden bi’l-vekâle tamamen ve kâmilen ahz u kabz edip bey‘-ı mezkûrun tağrîr ve gabnine ve istifâ-yı semene ve bi’l-cümle gedik husûsuna müte‘allika âmme-i da‘vâdan bi’l-asâle ve bi’l-vekâle herbirimiz âharın zimmetini ibrâ ve ıskāt ve ibrâlarımızı kabûl eyledik ba‘de’l-yevm sâlifü’z-zikr çörekçi ve kebabcı dükkânlarında mevcûde evân-ı nuhâs ve bi’l-cümle sâir âlât-ı lâzıme-i ma‘lûmenin sülüsleri mezbûre Zeyneb Hatun’un ırsen ve şirâen müstakilleten mülk-i sahîh ve hakk-ı sarîhi olup karındaşım müvekkilim mezbûr Ahmed Usta’nın eşyâ ve gediğinde kat‘a alâka ve medhali kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 Zilka‘de sene 1183. Şuhûdü’l-hâl: Kethudâ Ahmed Usta, Yiğitbaşı Mustafa Usta b. Ahmed, Şerbetci Mustafa b. Halil, Kebabcı Osman Usta b. Mehmed, Ali Çelebi [b.] Abdullah.