İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 46 Hüküm no: 2 Orijinal metin no: [1a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahtakale’deki kebapçı ve çörekçi dükkânlarının sahibesi Zeyneb’in hoşafı eskiden olduğu gibi Hoşafçı Hacı Hüseyin’den almaya söz verdiği Kebabcı Mahmiye-i İslambol’da Tahtakale sûkunda vâki‘ zikri âtî kebabcı ve çörekçi dükkânlarının sülüs gediklerine bâ-hüccet-i şer‘iye mutasarrıfe olup zâtı ta‘rîf-i şer‘î ile mu‘arrefe olan Zeyneb bt. Mustafa nâm hatun meclis-i şer‘-i şerîf-i enverde hoşâbcı tâifesinden işbu bâ‘isü’l-kitâb el-Hâc Hüseyin b. Abdullah nâm kimesne mahzarında ikrâr ve takrîr-i kelâm edip mârrü’z-zikr kebabcı ve çörekçi dükkânları derûnlarında mevcûd gedik ta‘bîr olunur evân-ı nuhâs ve sâir âlât-ı lâzımelerin ber-mûceb-i hüccet-i şer‘iye sülüs-i şâyi‘leri benim yedimde mülk ve hakkım olmağla zikrolunan kebabcı dükkânına iktizâ eden hoşâb kadîmden ittisâlinde vâki‘ mezbûr el-Hâc Hüseyin’in tasarrufunda olan hoşâbcı dükkânından alınagelirken biraz müddetden beri terk olunmuşidi el-hâletü hâzihî kethudâ ve sâir ustalar ma‘rifetiyle zikrolunan kebabcı ve çörekçi dükkânına ikāme eylediği kimesne fîmâ-ba‘d iktizâ eden hoşâbı kemâ-fi’s-sâbık kadîmden alınageldiği vech üzere mezbûr el-Hâc Hüseyin’in mutasarrıf olduğu mârrü’z-zikr hoşâbcı dükkânından alıp mugāyir-i kadîm hareket olunmamak üzere ta‘ahhüd eyledim dedikde mezbûr el-Hâc Hüseyin dahi râzı ve mukırre-i mezbûre Âişe (Zeyneb) Hatun’un ta‘ahhüdünü kabûl ol dahi mugāyir-i kadîm hareket etmemek üzere müte‘ahhide olmağın mâ-vaka‘a bi’t-taleb ketb olundu. Fî 22 Zilka‘de sene 1183. Şuhûdu’l-hâl: Kethudâ Ahmed Usta, Yiğitbaşı Mustafa b. Ahmed, Şerbetci Mustafa b. Halil, Kebabcı Osman Usta, Ali Çelebi b. Abdullah.