İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 51 Hüküm no: 8 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Ali Usta’nın Büyükkaraman çarşısında bulunan iki adet fırınını satması hakkında terkin edilmiş kayıt <<Çörekci ustalarından olup mahmiye-i İslambol’da Dülgeroğlu mahallesinde sâkin Ali Usta b. Mehmed nâm kimesne meclis-i şer‘-i şerîf-i enverde işbu bâ‘iseyi’l-kitâb Mustafa Usta b. Mehmed nâm kimesne kendi nefsinden asîl ve kız karındaşı Âişe Hatun bt. Mehmed tarafından vech-i âtî üzere tasdîka vekîli olmağla mezbûr Mustafa Usta mahzarında ikrâr-ı tâm ve takrîr-i kelâm edip Sultân Mehmed Han Câmi‘-i şerîfi civârında Karaman-ı kebîr sûkunda vâki‘ çörekçi fırını derûnunda mevcûde evân-ı nuhâs ve bi’l-cümle âlât-ı lâzıme-i ma‘lûmenin dört sehim i‘tibârıyla bir sehmi benim mülküm olmağla ben i‘tibâr-ı mezkûr ile mâlik olduğum bir sehim hisseme isâbet eden yüz yirmi sekiz buçuk vakıyye evân-ı nuhâs ve âlât-ı lâzımeyi dört yüz guruşa ve yine Sarrâchâne ittisâlinde Haffâfhâne kapısı karşısında vâki‘ çörekçi fırını derûnunda mevcûde evân-ı nuhâs ve bi’l-cümle sâir âlât-ı lâzımenin kezâlik dört sehim i‘tibârıyla iki sehmi benim mâlım ve mülküm ve iki sehmi dahi Mahmud Usta nâm kimesnenin mülkü olmağla ben i‘tibâr-ı mezkûr ile mâlik olduğum iki sehim hisseme isâbet eden yetmiş vakıyye evân-ı nuhâs ve âlât-ı lâzımeyi altı yüz guruşa tarafeynden îcâb ve kabûlü hâvî şürût-ı müfsideden ârî bey‘-ı kat‘î ile mezbûr Mustafa Usta ile kız karındaşı zevcem müvekkile-i mezbûre Âişe Hatun’a mütesâviyen bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm eylediklerinden sonra semeneyn-i mezkûreyn cem‘an bin guruşu mezkûrân Mustafa Usta ve Âişe Hatun yedlerinden tamamen ve kâmilen ahz u kabz edip bey‘-ı mezkûrun tağrîrine ve istifâ-yı semene ve gedik husûsuna müte‘allika âmme-i da‘vâdan herbirimiz âharın zimmetini ibrâ-i âm ile ibrâ ve ıskāt ve herbirimiz âharın ibrâsını kabûl eyledik ba‘de’l-yevm zikrolunan çörekçi fırınlarının gedikleri ta‘bîr olunur evân-ı nuhâs ve bi’l-cümle sâir âlât-ı lâzımenin i‘tibâr-ı mezkûr>>