İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 50 Hüküm no: 7 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortalıktan kaybolan Alanyalı Hasan’ın kuruyemişçi dükkânındaki, kardeşine teslim edilen eşyaların defteri Mahmiye-i İslambol’da ( ) mahallesi ahâlîsinden Yusuf Ağa b. Mustafa’nın li-ebeveyn karındaşı ve tarafından husûs-ı âtîde vekîl-i şer‘îsi olan Ahmed Ağa nâm kimesne meclis-i şer‘de bi’l-vekâle takrîr-i kelâm edip mahmiye-i mezbûrede Çardak İskelesi kurbünde kasab dükkânı ittisâlinde vâki‘ karındaşım müvekkilim mezbûr Yusuf Ağa’nın tasarrufunda olan bir bâb kuruyemişçi dükkânının müste’ciri olan Alanyalı Hasan nâm kimesne gaybet edip dükkân-ı mezkûr mukaffel ve mu‘attal kalmağın işbu yedimde olan fermân-ı âlî mûcebince cânib-i şer‘den üzerine varılıp ba‘de’l-feth gāib-i mezbûrun dükkân içinde olan eşyâsı ba‘de’t-tahrîr yed-i emîne vaz‘ olunup dükkân-ı mezbûr bana teslîm olunmak bi’l-vekâle matlûbumdur deyü fermân-ı âlî ibrâz etmeğin imtisâlen-leh cânib-i şer‘den mürsel Feyzullah Âbid Efendi zikrolunan dükkâna varıp zeyl-i defterde muharrerü’l-esâmî bâzârbaşı vekîli ve kuruyemişçi esnâfı kethudâları ve ihtiyârları huzûrunda dükkân-ı mezkûru ba‘de’l-feth içinde olan eşyâsını tahrîr ve gāib-i mezbûrun hâli mütebeyyin oluncaya değin hıfz için emîn ve müstakīm olduğu ihbâr olunup ihtiyâr eyledikleri vekîli mezbûr Ahmed Ağa kayyım nasb ü ta‘yîn ve yedine bi-tarîkı’l-emâne vaz‘ ve teslîm eylediği eşyâ defteridir ki ber-vech-i âtî zikrolunur. İzmir siyahî üzüm 20 kıyye fî 12 meblağ 240 Razakî üzüm 25 kıyye, fî 16 meblağ 400 Erik 2 kıyye meblağ 24 Harnub 44 kıyye meblağ 180 Sitil 2 kıyye meblağ 24 Peşkir 2 meblağ 600 Piş-tahta 1 meblağ 60 Terâzi ma‘a derâhim meblağ 200 Altın veznesi meblağ 60 Sepedler ve zenbiller ve kutular ve akçe tahtaları ve hurdevât meblağ 360 Hurrire fi’l-yevmi’l-işrîn min-Zilhicceti’ş-şerîfe li-sene selâse ve semânîn ve mie ve elf. Şuhûdu’l-hâl: Bâzârbaşı vekîli Eyübî Ali Ağa, Bakkalân Bölükbaşısı Ahmed Usta, Kuruyemişci Kethudâsı el-Hâc Mustafa, diğer el-Hâc Mustafa, Peştemalci el-Hâc Mustafa, Tuzcu es-Seyyid el-Hâc Mustafa, el-Hâc Ali, el-Hâc Mehmed.