İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 49 Hüküm no: 6 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aynacı Abdi’nin Aynacılar çarşısındaki dükkân hissesini Yusuf Usta’ya sattığı Âyineci Âyineci esnâfından mahmiye-i İslambol’da Cafer Ağa mahallesinde sâkin el-Hâc Abdi b. Veli nâm kimesne meclis-i şer‘-i şerîf-i enverde esnâf-ı merkūmeden işbu bâ‘isü’l-kitâb Yiğitbaşı Yusuf Usta b. Abdullah mahzarında ikrâr-ı tâm ve takrîr-i kelâm edip mahmiye-i mezbûrede Âyineciler sûkunda vâki‘ bir bâb âyineci dükkânı derûnunda mevcûde beyne’l-hiref gedik ta‘bîr olunur ber-mûceb-i defter âyineci âlât-ı lâzımesinin dört sehim i‘tibârıyla bir sehmi benim ve üç sehmi mezbûr Yusuf Usta’nın yedimizde mâlımız olmağla ben âlât-ı mezkûrede i‘tibâr-ı mezkûr ile mâlik olduğum bir sehim hissemi tarafeynden îcâb ve kabûlü hâvî şürût-ı müfsideden ârî bey‘-ı kat‘î ve safka-i vâhide ile merkūm Yusuf Usta’ya iki yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra mezbûr Yusuf Usta zimmetinde karz-ı şer‘îden alacak hakkım olan beş yüz guruşdan mâ‘adâ semen-i mezkûr iki yüz elli guruşa ve bey‘-ı mezkûrun tağrîr ve gabnine ve gedik husûsuna ve bi’l-cümle târih-i kitâba gelince beynimizde cereyân eden ahz u i‘tâ ve mu‘âmelât-ı şettâya ve sâir hukūk-ı ma‘lûme ve mechûleye müte‘allika âmme-i da‘vâdan ve kâffe-i mutâlebâtdan ben mezbûr Yusuf Usta’nın zimmetini ibrâ-i âm ile ibrâ ve ıskāt eylediğimde ol dahi kezâlik husûs-ı mezkûra ve fâide nâmıyla on bir senede beher şehr bana medfû‘u olup istihlâk eylediğim onar guruşdan cem‘an bin üç yüz yirmi guruşa ve sâire müte‘allika âmme-i da‘vâdan benim zimmetimi ibrâ-i âm ile ibrâ ve ıskāt ve herbirimiz âharın ibrâsını kabûl eyledik dedikde gıbbe’t-tasdîkı’ş-şer‘î mezbûr Yusuf Usta karzdan mukırr-ı mezbûr el-Hâc Abdi’ye deyni olan meblağ-ı mezkûr beş yüz guruşu alâ-vechi’l-helâl ba‘de’l-i‘mâl nemâsından beher şehr kendiye sekizer guruş vermek üzere ta‘ahhüd eyledikde ol dahi râzı olmağın mâ-vaka‘a bi’t-taleb ketb olundu. Fî 19 Zilhicce sene 1183. Şuhûdu’l-hâl: Feyzullah Ağa b. Mustafa, Monla Mehmed Emin b. Mustafa, İbrahim Çelebi b. Mustafa, Sultân Mehmed Aşcıbaşısı Mehmed Ağa, Süleyman Ağa b. el-mezbûr Mehmed Ağa, Manav Mehmed Beşe.