İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 49 Hüküm no: 5 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un oğlu Çorbacı Selim Ağa’nın terekesini zapt eden İsmail Efendi ile vekili İmâm Ahmed Efendi’nin zimmetlerini ibrâ ettiği Dergâh-ı âlî yeniçerileri çorbacılarından ve mahmiye-i İstanbul’da Arabacı Bâyezid mahallesi ahâlîsinden olup ordu-yı hümâyûn ile Moskov keferesi cânibine vukū‘ bulan sefere gidip Bender kasabasında mukīm iken bundan akdem vefât eden Çorbacı Selim Ağa b. Osman Efendi’nin vâlidesi ve hasran vârisesi olup mahalle-i mezbûrede sâkine ve zâtı zeyl-i kitâbda muharrerü’l-esâmî Müslimîn ta‘rîfleriyle mu‘arrefe olan Safiye Hatun bt. Yusuf meclis-i şer‘-i şerîf-i enverde müteveffâ-yı mezbûrun hîn-i vefâtında yanında mevcûd terekesini kabz ve vâlidesi mezbûreye îsâle bi’l-vesâye vâzı‘u’l-yed olan kasaba-i mezbûrede mukīm Dergâh-ı âlî yeniçerileri yazıcılarından işbu bâ‘isü’l-kitâb Sekbânbaşızâde es-Seyyid İsmail Efendi b. Abdurrahman tarafından vech-i âtî üzere vekîl-i şer‘îsi olan İmâm-ı mahalle Ahmed Efendi b. el-Hâc ( ) mahzarında ikrâr-ı tâm ve takrîr-i kelâm edip oğlum müteveffâ-yı mezbûrun ber-mûceb-i defter-i kassâm terekesi esmânından hâsıl ba‘de ihrâci’l-mesârifi’l-lâzıme bin iki yüz yirmi iki guruşa müvekkil-i merkūm es-Seyyid İsmail Efendi ber-vech-i muharrer bi’l-vesâye vâzı‘u’l-yed olmağla merkūm es-Seyyid İsmail Efendi meblağ-ı mezkûr bin iki yüz yirmi iki guruşun üç yüz yirmi iki guruşunu yedinde ba‘de’l-ibkā mâ‘adâsı olan dokuz yüz guruşu merkūm [2a] imâm efendiye irsâl ve îsâl ve bana teslîm için tarafından tevkîl etmekle merkūm İmâm Ahmed Efendi dahi meblağ-ı mezbûr dokuz [yüz] guruşu vekâleten bana def‘ ü teslîm ben dahi yedinden tamamen ahz u kabz edip meblağ-ı mezkûr dokuz yüz guruşdan gerek müvekkil-i vasî-i merkūm es-Seyyid İsmail Efendi ve gerek vekîl-i merkūm İmâm Ahmed Efendi yed ve zimmetlerinde bir akçe ve bir habbe bâkī kalmamağla husûs-ı merkūma müte‘allika da‘vâdan zimmetlerini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 Zilhicce sene 1183. Şuhûdu’l-hâl: Şâhidûnü’s-sâbıkūn.