İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 48 Hüküm no: 4 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un işlerini görmek üzere Ahmed Efendi’yi vekil tayin ettiği Mahmiye-i İslambol’da Arabacı Bâyezid mahallesinde sâkine ve zâtı kitâbda muharrerü’l-esâmî Müslimîn ta‘rîfleriyle mu‘arrefe olan Safiye Hatun bt. Yusuf meclis-i şer‘-i şerîf-i enverde işbu bâ‘isü’l-kitâb İmâm-ı mahalle Ahmed Efendi b. el-Hâc Ali mahzarında ikrâr-ı tâm ve takrîr-i kelâm edip ben müsinne ve alîle olup bi’n-nefs umûrumu idâreye iktidârım olmamağla müteveffâ oğlum Çorbacı Selim Ağa’dan mevrûs yedimde mâlım olup mahalle-i mezbûrede sâkine Yazıcı es-Seyyid İsmail Efendi zevcesi Ümmügülsüm Hatun bt. Şa‘ban yedinde mevzû‘ dokuz yüz guruşdan târih-i kitâbdan beher şehr yirmi beşer guruş benim nafaka ve sâir levâzım-ı zarûriyeme ve senevî ellişer guruşunu dahi elbisem mesârifine mezbûre Ümmügülsüm Hatun’dan ba‘de’l-ahz ber-vech-i muharrer harc u sarfa merkūm Ahmed Efendi’ye emir ve tarafımdan merkūmu vekîl ve nâib-i menâb nasb ü ta‘yîn eylediğimde ol dahi kabûl ve vech-i meşrûh üzere harc u sarfa ta‘ahhüd eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 Zilhicce sene 1183 Şuhûdu’l-hâl: es-Seyyid el-Hâc Mehmed Efendi b. Seyyid Hüseyin imâm-ı Kâtib Muslihiddin, Kocamustafapaşa’da Berber Halil Odabaşı b. el-Hâc Hasan, Müezzin es-Seyyid Molla Hüseyin b. Musa, Dergâh-ı âlî yeniçerileri çavuşlarından Salih Çavuş, Gümüşterazili Mahmud Ağa, Hüseyin Ağa b. Abdullah, Haffâf İsmail Çelebi b. Abdullah, Mehmed Odabaşı, Ali Çelebi b. Abdullah el-muhzır.