İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 56 Hüküm no: 12 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Çolak Tomas’ın vârislerinin Çukurçeşme’deki fırın ve değirmendeki hisselerini sattıkları Vilâyet-i Anadolu’da Divriği kazâsına tâbi Kesme nâm karye ahâlîsinden olup mahmiye-i İslambol’da Sultân Mehmed Han Câmi‘-i şerîfi civârında Büyükkaraman’da Yeşildirekli demekle ma‘rûf dükkânda sarrâf iken bundan akdem hâlik olan Çolak Tomas v. Barsam nâm zimmînin sulbiye kızı oğlu İsador nâm zimmî kendi nefsinden asîl ve babası Ariton v. İsador ve li-ebeveyn karındaşı Avanis nâm zimmîler taraflarından husûs-ı âti’l-beyânda sâbitü’l-vekâle vekîlleri olmakla mezbûr İsador asâleten ve vekâleten ve hâlik-i mezbûrun âhar sulbiye kızı oğlu Tomas nâm zimmî dahi kendi nefsinden asîl ve babası İsayi v. Paris nâm zimmî tarafından kezâlik zikri âtî husûsda sâbitü’l-vekâle vekîli olmakla mezbûr Tomas zimmî dahi asâleten ve vekâleten meclis-i şer‘-i şerîf-i enverde hâlik-i mesfûrun li-ebeveyn karındaşı oğlu işbu bâ‘isü’r-rakīm Ariton v. İsador nâm zimmî muvâcehesinde herbiri bi’l-asâle ve bi’l-vekâle ikrâr ve takrîr-i kelâm edip mahmiye-i mezbûrede Çukurçeşme kurbünde vâki‘ ekmekçi fırını ve ona merbût altı horoslu değirmen derûnunda mevcûde yirmi dört re’s bargir ve bi’l-cümle sâir âlât-ı lâzıme-i ma‘lûme ile fırın-ı mezkûr karşısında vâki‘ üç horoslu uncu değirmeni derûnunda mevcûde iki re’s bargir ve bi’l-cümle sâir âlât-ı lâzıme-i ma‘lûmenin üç sehim i‘tibârıyla iki sehmi mezbûr Ariton zimmînin malı ve mülkü ve bir sehmi dahi yedimizde olan bir kıt‘a ilâm ve bir kıt‘a hüccet-i şer‘iyeler mantûklarınca bizim ve müvekkillerimiz mezbûrûnun yedimizde mülkümüz olmakla biz ber-mûceb-i i‘tibâr-ı mezkûr bir sehim hissemize isâbet eden on iki re’s bargirler ile sâir ber-mûceb-i defter-i müfredât eşyâ ve âlât-ı lâzıme-i ma‘lûmeyi tarafeynden îcâb ve kabûlü hâvî şürût-ı müfsideden ârî bey‘-ı kat‘î ve safka-i vâhide ile mezbûr Ariton zimmîye asâleten ve vekâleten iki bin iki yüz elli guruşa bey‘ ve temlîk ve lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezkûr iki bin iki yüz elli guruş mezbûr Ariton zimmî yedinden bi-kadri’l-hısas asâleten ve vekâleten bi’t-tamam ve’l-kemâl ahz u kabz edip bey‘-ı mezkûrun tağrîr ve gabnine ve istifâ-i semene ve bi’l-cümle gedik husûsuna müte‘allika âmme-i de‘âvî ve kâffe-i [4b] mutâlebâtdan herbirimiz âharın zimmetini asâleten ve vekâleten ibrâ-i âm ile ibrâ ve ıskāt ve herbirimiz âharın ibrâsını kabûl etdik ba‘de’l-yevm mârrü’z-zikr fırın ve değirmenlerde mevcûde bargirler ve bi’l-cümle sâir âlât-ı lâzıme ve eşyâ-i ma‘lûme müstakillen mersûm Avanis (Ariton) zimmînin mülk-i sahîh ve hakk-ı sarîhi olup bizim ve müvekkillerimiz mersûmûnun kat‘a alâka ve medhalimiz kalmamışdır keyfe mâ yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î mersûm Ariton zimmî şürût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü vaz‘ ve hareket etmemek üzere ta‘ahhüd etmeğin mâ vaka‘a bi’t-taleb ketb olundu. Fî 18 Zilhicceti’ş-şerîfe sene 1183. Şuhûdu’l-hâl: Ekmekciler Kethudâsı Ali Ağa, Kanlı[fırın] Ustası Ahmed Ağa, Ketânîzâde el-Hâc Mustafa Ağa, es-Seyyid el-Hâc Ebûbekir, el-Hâc Mahmud, Papasoğlu Bogos, Babaali Ustası Markos, Uncu Vartan, Mirâhur Ustası Sahak.