İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 55 Hüküm no: 11 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mollacıkzâde Mehmed Bey ve kız kardeşinin İncirli köyündeki bostanlarını kiraya verdikleri Havâss-ı refi‘a kazâsına tâbi İncirli karyesinde vâki‘ Mollacıkzâde Bostanı demekle ma‘rûf bostanda müste’ciren mütemekkinler Hristo v. Çaço ve Restan v. Mitro nâm zimmîler meclis-i şer‘-i şerîf-i enverde işbu sahibeyi’l-kitâb mefharu’l-emâsil ve’l-akrân Mehmed Beyefendi b. el-merhûm Mollacıkzâde Ali Paşa ile hemşîresi fahrü’l-muhadderât Zübeyde Hanım taraflarından husûs-ı âtîde vekîl-i şer‘îleri olan Çukadâr Mehmed b. Süleyman nâm kimesne muvâcehesinde herbiri ikrâr ve takrîr-i kelâm edip ve karye-i mezbûrede vâki‘ taht-ı icâremizde olan bostan ittisâlinde vâki‘ müvekkilân-ı mûmâ-ileyhimânın tasarruflarında olan bostanda senevî yetmiş guruş icâre ile müste’cir olan Çato nâm zimmî firâr ve gaybet etmekle gāib-i mersûmun derûn-ı bostanda mezrû‘ malı olan sebzevât-ı mütenevvi‘a zeyl-i kitâbda muharrerü’l-esâmî kethudâ ve yiğitbaşı ve sâir ustalar ma‘rifetleriyle tahmîn-i sahîh ile bi’t-taleb tahmîn ve takvîm olundukda yüz on bir guruşa bâliğ ve sebzevât-ı mezkûresini teslîm biz dahi kabz edip bostan-ı mezkûru dahi ba‘de’l-istîcar gāib-i mezbûrun bostan kirâsından bâkī otuz beş guruş deynini biz makbûzumuz olan sebzevât-ı mezkûre kıymetlerinden vekîl-i mezbûr Çukadâr Mehmed yediyle müvekkilân-ı mûmâ-ileyhimâya teslîm ve edâ ve mâ‘adâsı olan yetmiş altı guruşun yetmiş [4a] guruşunu re’s-i senemiz olan sene-i âtiyede vâki‘ rûz-ı Kasım’da yine müvekkilân-ı mûmâ-ileyhimâya teslîm ve edâya ta‘ahhüd eylediğimizden sonra vekîl-i mezbûr Çukadâr Mehmed zikrolunan bostanı senevî yetmiş guruşa ücret tesmiyesiyle vekâleten bize îcâr ve teslîm eyledikde biz dahi ber-vech-i muharrer istîcâr ve kabûl edip ücret-i mezkûre yetmiş guruşu beher re’s-i senede vekîl-i mezbûr yediyle sahibleri müvekkilân-ı mûmâ-ileyhimâ Mehmed Bey ve Zübeyde Hanım’a edâ ve teslîme ta‘ahhüd eyledik dediklerinde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 25 Zilhicce sene 1183. Şuhûdu’l-hâl: Bağçevânlar Kethudâsı Hasan Ağa, Osman Usta b. İbrahim, Bağçevân İbrahim Beşe b. İshak, Bağçevân Ömer Beşe, Ali Çelebi b. Abdullah, Yiğitbaşı İlya v. Hristo, Simo v. Miho, Yanko v. Mano ve Petho v. İlya.