Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 171 Hüküm no: 246 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğanlık köyünden Veli Beşe'nin bağını İbrahim Bey'e satması Medîne-i Üsküdar’a muzâfe Adalar nâhiyesine tâbi‘ Soğanlık karyesi sükkânından Veli Beşe b. Mustafa nâm kimesne meclis-i şer‘-i hatîr-i lâzımü’t-tevkīrde işbu bâ‘isü hâze’l-kitâb İbrahim Bey b. Mustafa mahzarında ikrâr ve takrîr-i kelâm edip karye-i mezbûre hudûdunda Rahman nâm mevzi‘de vâki‘ bir tarafdan Molla Mehmed Halîfe bağı ve bir tarafdan el-Hâc Mehmed ile İsmail Beşe bağı ve iki tarafdan tarîk-i âm ile mahdûd tahmînen on bin çubuk yerli ve hora bağımı ve eşcâr-ı müsmire ve gayr-ı müsmire[yi] müştemil bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı kat‘î ile mezbûr İbrahim Bey’e yüz kırk dokuz kıt‘a esedî guruşa bey‘ ve teslîm ve kabz-ı semen eyledikde ol dahi minvâl-i muharrer üzere iştirâ ve tesellüm ve kabz eyledikden sonra semeni olan meblağ-ı merkūm yüz kırk dokuz kıt‘a esedî guruşu mezbûr İbrahim Bey yedinden bi’t-tamâm ahz u kabz eyledim, ba‘de’l-yevm bağ-ı mahdûd-ı mezkûr mezbûr İbrahim Bey’in mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâdis aşer min-Zilka‘deti’ş-şerîfe sene 1120 Şuhûdü’l-hâl: el-Hâc Mehmed, Mustafa Beşe, Mehmed Beşe b. Ahmed, Hasan Çelebi Hüddâm, Kasab Mustafa, Musa Beşe b. Mehmed.