Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 171 Hüküm no: 247 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maltepe köyünden Semiki'nin dükkân hissesini Likori'ye satması Medîne-i Üsküdar’a muzâfe Adalar nâhiyesine tâbi‘ Maltepe karyesi sâkinelerinden Semiki v. Yorgi Nasrâniye tarafından bey‘-i âti’l-beyâna Kiryako v. Aksir? ve Yorgi v. Argiri zimmîler şehâdetleriyle vekâleti sâbite olan Malamat v. Romane zimmî bi’l-vekâle meclis-i şer‘-i hatîr-i lâzımü’t-tevkīrde işbu bâ‘isü hâze’s-sifr Likori v. Yani mahzarında ikrâr ve takrîr-i kelâm edip müvekkilem mesfûre Semiki Nasrâniyenin karye-i mezbûrede vâki‘ bir tarafdan Palaş zimmî menzili ve bir tarafdan mesfûre Semiki menzili ve iki tarafdan tarîk-i âm ile mahdûd dükkânın nısf hisse-i şâyi‘asını tarafeynden îcâb ve kabûlü hâvî bey‘-i bâtt-ı kat‘î ile mesfûr Likori zimmîye seksen beş kıt‘a esedî guruşa bey‘ ve teslîm ve kabz-ı semen eyledikden sonra semeni olan meblağ-ı merkūm seksen beş kıt‘a esedî guruşu mesfûr Likori zimmî yedinden bi’t-tamâm ahz u kabz eyledim, ba‘de’l-yevm dükkânın nısf hisse-i şâyi‘ası mesfûr Likori zimmînin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâmin aşer min-Zilka‘deti’ş-şerîfe li-sene ışrîn ve mi'e ve elf. Şuhûdü’l-hâl: Süleyman Bey, Mehmed Ağa, Halil Ağa, Hasan Çelebi, Kara Ali Beşe, Damborsin v. Yani, Nikola v. Ahsarami?, Soskola? v. Yani.