Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 172 Hüküm no: 248 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuzla köyünden Gatola'nın evini Ali Beşe'ye satması Medîne-i Üsküdar’a muzâfe Adalar nâhiyesine tâbi‘ Tuzla nâm karye sâkinelerinden Gatola v. Yanaki Nasrâniye meclis-i şer‘-i hatîr-i lâzımü’t-tevkīrde işbu hâfizü hâze’l-kitâb Ali Beşe b. Mustafa mahzarında ikrâr ve takrîr-i kelâm edip karye-i mezbûrede hammâm kurbünde vâki‘ bir tarafdan mîrî hâne ve bir tarafdan Esirci Ali ile Hasan menzili ve iki tarafdan tarîk-i âm ile mahdûd mülk menzilimi ve ahır ve bir mikdâr bağçeyi müştemil bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı kat‘î ile mezbûr Ali Beşe’ye elli kıt‘a esedî guruşa bey‘ ve teslîm ve kabz-ı semen eyledikde ol dahi minvâl-i muharrer üzere iştirâ ve kabz ve tesellüm eyledikden sonra semeni olan meblağ-ı mezbûr elli kıt‘a esedî guruşu mezbûr Ali Beşe yedinden bi’t-tamâm ahz u kabz eyledim, ba‘de’l-yevm menzil-i mahdûd-ı mezkûr mezbûr Ali Beşe’nin mülk-i müşterâsıdır, keyfe mâ [yeşâ ve] yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min-Şevvâli’l-mükerrem li-sene ışrîn ve mi'e ve elf. Şuhûdü’l-hâl: Fahrü’l-eşbâh Mehmed, İsmail Beşe, Mehmed Beşe b. Ali, Ali Beşe, Mehmed Çelebi, Hasan Çelebi b. Ahmed, Veli b. Hasan.