Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 172 Hüküm no: 249 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Polinmer'in ev hissesini Hıristolo'ya satması Medîne-i Üsküdar’a muzâfe Adalar nâhiyesine tâbi‘ Kartal karyesi sükkânından Polinmer v. Kiryazi zimmî meclis-i şer‘-i hatîr-i lâzımü’t-tevkīrde işbu bâ‘isü hâze’s-sifr Hıristolo v. Yani zimmî mahzarında ikrâr ve takrîr-i kelâm edip karye-i mezbûrede vâki‘ bir tarafdan Papa İstavro menzili ve bir tarafdan Bayramoğulları dükkânı ve iki tarafdan tarîk-i âm ile mahdûd tahtânî bir bâb oda ve bir mahzen ve bir dükkân ve fevkānî iki bâb odalar[ın] nısf hisse-i şâyi‘asını mesfûr Hıristolo zimmîye bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı kat‘î ile yüz on guruşa bey‘ ve teslîm ve kabz-ı semen eyledikde ol dahi minvâl-i muharrer üzere iştirâ ve tesellüm ve kabz eyledikden sonra semeni olan meblağ-ı merkūm yüz on guruşu mesfûr Hıristolo zimmî yedinden bi’t-tamâm ahz u kabz eyledim, ba‘de’l-yevm menzil-i mahdûd-ı mezkûrun nısf hisse-i şâyi‘ası mesfûr Hıristolo zimmînin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min-Zilka‘deti’ş-şerîfe li-sene ışrîn ve mi'e ve elf. Şuhûdü’l-hâl: el-Hâc Ali, Hüseyin Beşe Molla, Ali Beşe, Ömer Beşe, Berber İbrahim Çelebi, Hasan Çelebi Hüddâm. Danyel Mîrî Kasab, Papa Istavro, Yamandi v. Kiryazi, Kiryazi v. Yorgi, Panayot sâkin-i Pendik.