Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 173 Hüküm no: 250 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Polinmer'in ev hissesini hanımı Angeli'ye satması Medîne-i Üsküdar’a muzâfe Adalar nâhiyesine tâbi‘ Kartal karyesi sükkânından Polinmer v. Kiryazi zimmî meclis-i şer‘-i hatîr-i lâzımü’t-tevkīrde işbu bâ‘isü hâzihi’s-sifr zevcesi Angeli v. Yorgi Nasrâniye mahzarında ikrâr ve takrîr-i kelâm edip karye-i mezbûrede vâki‘ bir tarafdan Papa İstavros menzili ve bir tarafdan Bayramoğulları dükkânı ve iki tarafdan tarîk-i âm ile mahdûd tahtânî bir bâb oda ve bir mahzen ve bir dükkân ve fevkānî iki bâb odanın nısf hisse-i şâyi‘asını mesfûre Angeli Nasrâniyeye bi-cümleti’t-tevâbi‘ ve’l-levâhık tarafeynden îcâb ve kabûlü [hâvî] bey‘-i bâtt-ı kat‘î ile yüz on guruşa bey‘ ve teslîm ve kabz-ı semen eyledikde ol dahi minvâl-i muharrer üzere iştirâ ve tesellüm ve kabz eyledikden sonra semeni olan meblağ-ı merkūm yüz on guruşu mesfûre Angeli Nasraniye yedinden ahz u kabz eyledim, ba‘de’l-yevm menzil-i mahdûd-ı mezkûrun nısf hisse-i şâyi‘asını mesfûre Angeli Nasrâniyenin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î. Hurrire fî 25 C sene 1120 Şuhûdü’l-hâl: Es-sâbıkūn.