Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 178 Hüküm no: 259 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer esnasında askere zahire naklinde kullanılan Tersane-i âmire filikalarına reis ve gemici tayini ile ilgili hüküm Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u’l-a‘lâmi’ş-şerî‘ati ve’d-dîn vârisü’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în Mevlânâ Üsküdar kādîsı -zîde fezâilehû- ve mefâhirü’l-emâsil ve’l-akrân a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olıcak ma‘lûm ola ki, inşâallâhu te‘âlâ işbu sene-i mübârekede vâki‘ sefer-i hümâyûn-ı nusret-makrûna memûr asâkir-i İslâm’ın zahîreleri nakli içün iktizâ eden filika sefinelerinden hâlâ Tersâne-i âmire’de mevcûd olan on yedi kıt‘a filika sefinelerinin her birilerine birer nefer reis ve sekiz nefer gemicileri tedârik ve mevcûd etdirilmesi mühim ve muktezî olmağın ahâlî-i vilâyet beynlerinden ma‘rifet-i şer‘le Karadeniz ahvâlini bilir yarar kefîlleriyle Üsküdar kazâsına tâbi‘ kurâdan ve adalardan irsâl olunan imzâlu defterde tasrîh olunduğu üzere sekiz nefer reis altmış dört nefer gemici reislerinin beher neferine beher mâh onar guruş ve gemicilerinin her bir neferine beher mâh beşer guruş ücretleri taraf-ı mîrîden verilmek üzere bin yüz yirmi beş senesi Rebî‘ülevveli gurresinden hizmetde olduklarınca müstahak olacakları ücretlerine mahsûb olunmak şartıyla sene-i sâbık üzere ikişer aylık ücretleri ber-vech-i peşîn düstûr-ı mükerrem müşîr-i müfehham nizâmü’l-âlem hâlâ kapudanım olan vezîrim ( ) Paşa -edâmallâhu te‘âlâ iclâlehû- tarafından ta‘yîn olunan mübâşir her birinin yerlerine ma‘rifet-i şer‘le mahallerinde teslîm ve teslîm olunduğuna ale’l-esâmî defter ve hüccet-i şer‘iye etdirilip Karadeniz ahvâlini bilir ol mikdâr reis ve gemicileri firâr eylemeyip edâ-i hizmet eylemek şartıyla ahâlî-i kazâ beynlerinde ma‘rifet-i şer‘le yarar kefîlleri alınıp ve müfredât üzere kefîlleri ile defter etdirilip ve bin yüz yirmi beş senesi şehr-i Rebî‘ülevvel gurresinden Âsitâne-i sa‘âdeti’imden Tersâne-i âmire’mde mevcûd bulunmak şartıyla kazâ-i mezbûra tâbi‘ zikr olunan mahallerinden tedârik ve ihrâc ve hâzır ve mevcûd etdirilip müfredât üzere defter ve hüccet-i şer‘iyeyi rikâb-ı hümâyûnuma irsâl ve arz u i‘lâm eylemek bâbında fermân-ı âlîşânım sâdır olmuşdur, buyurdum ki hükm-i şerîfimle ( ) vardıkda bu bâbda sâdır olan emrim üzere amel edip sen ki mevlânâ-yı mûmâ-ileyh ve a‘yân-ı vilâyetin iş erlerisiz, fermânım üzere kazâ-i mezbûr ahâlîsi beynlerinde Karadeniz ahvâlini bilir ol mikdâr reis ve gemiciler ma‘rifet-i şer‘le yarar kefîlleri alıp ve müfredât üzere kefîlleriyle defter ve vakt-i mezbûrda Âsitâne-i sa‘âdet’imden Tersâne-i âmire’mde mevcûd bulunmak şartıyla kazâ-i mezbûr[a] tâbi‘ zikr olunan mahallerden tedârik ve ihrâc ve mevcûd etdirilmekde her biriniz ziyâde takayyüd ve ihtimâm edip işbu emr-i âlîşânımın hilâfıyla vaz‘ u hareketden be-gāyet [ihtirâz] eyleyesiz ve müfredât üzere defter ve hüccet-i şer‘iyeyi rikâb-ı hümâyûnuma irsâl ve arz [u] i‘lâm eyleyesiz, şöyle bilesiz, alâmet-i şerîfime i‘timâd kılasız. Tahrîren fi’l-yevmi’l-ışrîn min-Zilhicceti’ş-şerîfe li-sene erba‘a ve ışrîn ve mi'e ve elf. Sahrâ-yı Edirne.