Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 180 Hüküm no: 261 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal Mukataası dahilinde eşkıyalık yapan Mehmed ile arkadaşı Ahmed'in yakalanarak İstanbul'a gönderilmesi emri Kıdvetü’n-nüvvâb ve’l-müteşerri‘în Kartal karyesinde nâibü’ş-şer‘ olan efendi -zîde fazluhû- dürer-i da‘avât-ı sâfiyât ithâfından sonra muhibbâne inhâ olunur ki, merhûm ve mağfûr Sultan Orhan -tâbe serâhu- Hazretleri Evkāfı’ndan Kartal Mukāta‘ası’nda hâlâ subaşı olan Halil -zîde kadruhû- Dîvân-ı hümâyûnuma arzuhâl edip mukāta‘a-i mezbûrda zümre-i eşkıyâdan Donuk? Mehmed ve refîki Ahmed nâm eşkıyâların aslâ bir dirlikde alâkaları olmayıp müddeîler? yabancılık iddi‘âsıyla karye-i mezbûrda yatmayıp icrâ-yı fesâd içün kendülerinden birer çardak ihdâs edip gece gündüz yol bekleyip gözlerini kesdirdiklerini soyup şerr [u] fesâdlarından re‘âyâ ve berâyâ ve ebnâ-i sebîl emîn olmayıp ziyâde fesâd ve şekāvet eyledikleri, evkāf-ı mezbûrun mahsûlü noksânına bâ‘is [ve] bâdî oldukların bildirip mezbûr şakīleri ahz ve Âsitâne-i sa‘âdete ihzâr olmaları bâbında fermân-ı âlî sâdır olmağın mûcebince işbu mektûb tahrîr ve kıdvetü’l-emâsil ve’l-akrân ocak çavuşlarından on sekiz bölük yoldaşı çavuş -zîde kadruhû- mübâşir ta‘yîn ve irsâl olunmuşdur, vusûlünde sen ki mevlânâ-yı mûmâ-ileyhsin, fermân buyurulduğu vech üzere zikr olunan iki nefer şakī bi-eyyi hâlin ahzetdirdip mübâşir-i merkūma teslîm ve Âsitâne-i sa‘âdetime ihzâr eylemekde dikkat-i tâm ve sa‘y-i ihtimâm edip mûceb-i mektûb ile âmil olasız. Tahrîren fî 22 Cemâziyelâhir sene 1125 Zâbiti ma‘rifetleriyle huzûra ihzâr olunalar deyü buyuruldu. El-emru kemâ rukime fîh, nemekahû el-fakīru ileyhi azze şânühû Lisânî Mustafa el-müvellâ-hilâfeten bi-nâhiyeti Adalar -ufiye anhu-