Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 180 Hüküm no: 262 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Yorgaki'nin evi ile bağlarını oğlu Anaştaş'a satması Medîne-i Üsküdar muzâfâtından Adalar nâhiyesine tâbi‘ Kartal nâm karye mutavattınlarından Yorgaki v. Yani nâm zimmî meclis-i şer‘-i şerîfde sulbî kebîr oğlu işbu bâ‘isü’s-sifr Anaştaş nâm zimmî muvâcehesinde bi-tav‘ihî ikrâr ve takrîr-i kelâm edip silk-i mülkümde münselik olup karye-i mezbûrede vâki‘ etrâf-ı erba‘ası Yanaki ve Mosikona ve Yorgi ve Praşkova ve diğer Yorgi nâm zimmîler mülkleri ve tarîk-i âm ile mahdûd iki bâb fevkānî oda ve üç bâb tahtânî oda ve bir mahzen ve bir bi'r-i mâyı ve eşcâr-ı müsmire ve gayr-ı müsmireyi hâvî bağçeyi müştemil bir kıt‘a mülk menzilim ile karye-i mezbûre toprağında Yel değirmeni nâm mahâlde vâki‘ etrâf-ı erba‘ası Foti ve Todoş ve Avanis nâm zimmîler bağları ve tarîk-i âm ile mahdûd tahmînen kırk dönüm bir kıt‘a kürûmî mülk hora üzümü bağımı ve yine karye-i mezbûre hâricinde Yakacık toprağında vâki‘ bir tarafı Foti bağı ve bir tarafı Hacı Mehmed bağı ve bir tarafı Angora bağı ve bir tarafı tarîk-i âm ile mahdûd tahmînen on dört dönüm bir kıt‘a kürûmî mülk kış üzümü bağımı tarafeynden îcâb ve kabûlü hâvî bey‘-i bâtt-ı sahîh-i şer‘î ile oğlum mesfûr Anaştaş’a bin iki yüz guruşa bi-safkatin vâhidetin bey‘ ve teslîm eylediğimde ol dahi ber-vech-i muharrer iştirâ ve tesellüm ve kabz ü kabûl eyledikden sonra semeni olan meblağ-ı merkūm bin iki yüz guruşun mutâlebesinden oğlum mesfûr Anaştaş’ın zimmetini ibrâ-i âm ile ibrâ ve ıskāt eyledim, min-ba‘d menzil-i mahdûd-ı mezkûr ile bağeyn-i mahdûdeyn-i mezkûreynde benim kat‘â alâka ve medhalim kalmadı, oğlum mesfûr Anaştaş’ın mülk-i müşterâsı ve hakk-ı sırfıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Şevvâli’l-mükerrem sene ihdâ ve ışrîn ve mi'e ve elf. Şuhûdü’l-hâl: Halil Ağa b. Mehmed, el-Hâc Ali b. Mehmed, Hacı Mehmed b. Yakub, Mustafa Beşe b. Mehmed, Monlâ Mehmed b. Süleyman, İbrahim Çelebi b. Mehmed Berber, Ali Beşe b. Ramazan, Mehmed Beşe b. Musa, Ahmed Beşe b. Musa, diğer Mehmed Beşe b. Abdullah, Mehmed Beşe b. Ahmed, Mehmed Çelebi b. Ali ve gayruhum.