Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 184 Hüküm no: 267 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul'a gelecek olan İran sefirine yol boyunca yardımcı olunması emri Şerî‘at-şi‘âr Erzurum’dan Üsküdar’a varınca yol üzerinde vâki‘ olan kuzât efendiler -zîde fezâilühüm- ve mefâhirü’l-emâsil ve’l-akrân mütesellimler ve voyvodalar ve yeniçeri serdârları ve kethüdâ yerleri ve sâir a‘yân-ı vilâyet ve iş erleri -zîde kadruhum- inhâ olunur ki, taraf-ı İran’dan hizmet-i sefâret ile Âsitâne-i sa‘âdete âzim ve râhî olan ( ) -zîde kadruhû-’nun mu‘ayyen ağalarımızdan ( ) inşâallâhu te‘âlâ varıp her kangınızın taht-ı kazâsına dâhil olur ise mahâll-i me'menlerde nüzûl ve gecelerde bekletdirip ve mürûr u ubûr eylediği menâzil ve merâhilde yanına yarar kulağuzlar koşup emîn ve sâlim birbirlerinize irsâl ve îsâl etdirilip şöyle ki iyâzen billâhi te‘âlâ ve esvâb ve eşyâ ve nakillerine bir zarâr ve gezend erişdirilmemek üzere muhâfaza edip esnâ-i tarîkde bir dürlü hâhişle rencîde etdirilmekden tevakkī ve mûceb-i buyuruldu ile âmil olasız. El-Fakīr Ali Kāimmakām-ı Erzurum. Mûcebince fermân, sûret-i müfettiş efendi i‘lâmı.