Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 183 Hüküm no: 266 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer-i hümayuna çıkacak ordu için gerekli arpanın satın alınarak Üsküdar iskelesine nakledilmesi emri Tıbku aslihi’l-hatîr nemakahû el-fakīru ileyhi subhânehû ve te‘âlâ İsmail el-müvellâ-hilâfete bi-medîneti Üsküdar el-mahrûse. Akzâ kuzâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în Mevlânâ Üsküdar kādîsı -zîde fezâilehû- ve kıdvetü’l-kuzât ve’l-hükkâm ma‘denü’l-fazl ve’l-hükkâm Yoros ve Yalakâbad kādıları -zîde fazluhümâ- ve mefâhirü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyetin iş erleri -zîde kadruhum- tevkī‘-i refî‘-i hümâyûnum vâsıl olıcak ma‘lûm ola ki, inşâallâhu te‘âlâ evvel-i bahârda nakz-ı ahdi zuhûr eden Moskof kefere üzerine bizzât sefer-i hümâyûnum mukarrer ve muhakkak olmağla Istabl-ı âmirem davarları ve rikâb-ı hümâyûnuma memûr? kulların ve ahâlî-i dîvân ve sâire ta‘yînâtı içün küllî zahîre lâzım ve cümleden ehem ve a‘zam umûrları olup bulunan mahallerden mübâya‘a ve ihzârı muktezî olmağın şa‘îrin bahâ-i İstanbul kîlesi Üsküdar iskelesine nakli ile otuzar sağ akçeye olmak üzere ve lâzım gelen bahâları havâle olunan bedel-i sürsat mâlından mübâşir yedinden ashâbına tamâmen verilip bir akçelerin ketm olunmamak şartıyla ve şa‘îr-i mezbûrun mübâya‘ası ve nakli emr-i müsta‘celeden olmağla cem‘ ve tahsîli ve iskele-i mezbûra nakli ve teslîmi kıdvetü’l-emâsil ve’l-a‘yân -zîde mecdühû-’ya tefvîz olunmağla taht-ı kazâlarınızdan mübâya‘ası fermân olan on bin kîle şa‘îri mübâşirin yedine verilen mühürlü ve nişânlı mevkūfât defteri derûnunda her kazâya ta‘yîn ve tasrîh olunduğu üzere kimesneye cevr ve ta‘addî olunmamak şartıyla ve ma‘rifet-i şer‘le tevzî‘ ve bir gün evvel mübâya‘a ve tedârik ve iskele-i mezbûreye nakl ve kabzına memûr olana teslîm ve hâzır ve mevcûd etdirilmekde ziyâde dikkat eyleyesiz deyü fermânım olmuşdur, buyurdum ki hükm-i şerîfimle ( ) vardıkda bu bâbda sâdır olan emrim üzere amel edip dahi siz ki kādılar ve kethüdâ yerleri ve yeniçeri serdârları ve a‘yân-ı vilâyetin iş erlerisiz, taht-ı kazâlarınızda mübâya‘ası fermân olan ol mikdâr kîle şa‘îr sefer-i hümâyûnuma memûr asâkir-i mansûranın cümleden ehem ve a‘zam umûrundan olmağın cümleniz bi’l-ittifâk mübâşir-i mûmâ-ileyhe i‘ânet ve irsâl olunan mühürlü ve nişânlı defterde kazâya ta‘yîn ve tasrîh olunduğu üzere bir gün evvel mübâya‘a ve iskele-i mezbûra nakl ve kabzına memûr olana teslîm etdirilmekde ziyâde takayyüd edip avk u tehîrden be-gāyet ihtirâz eyleyesiz ve lâzım gelen bahâları fermânım olduğu üzere havâle olunan bedel-i sürsat mâlından akçesin edâ ve teslîm ve tamâmen teslîm olunduğunu hüccet-i şer‘iye etdirip mübâşir-i mezbûrun yedine veresin ki hîn-i hesâbda hesâbına mahsûb kılına, ammâ bu bâbda birinizin muhâlefet sebebiyle zehâir-i mezbûrun vakt ü zamânıyla takayyüd olunmayıp geride? kalmağla asker-i mansûranın muzâyakasına bâ‘is olasız, sonradan bir vechile özr ve cevâbınız mesmû‘-ı hümâyûnum olmayıp bu umûr-ı mühimmenin ta‘tîline bâ‘is olanınız ihzâr ve eşedd-i ukūbet ile cezâ tertîb olunur bilmiş olasız, âna göre basîret ve intibâh üzere olup bir gün evvel mübâya‘a ve nakl ve teslîme müciddü’l-emr? olasız, alâmet-i şerîfime i‘timâd kılasız. Tahrîren fi’s-sâmin aşer min-şehri Zilka‘de sene erba‘a ve ışrîn ve mi'e ve elf. Sahrâ-yı Edirne.