Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 183 Hüküm no: 265 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar kazası sürsat bedeliyle Mübaşir Haseki Ahmed Ağa tarafından arpa satın alınarak iskeleye nakledilmesi Nevâhî-i Üsküdar nüvvâbı efendiler el-mükerrem ba‘de’s-selâm inhâ olunur ki, bin yüz yirmi beş senesine mahsûb olmak üzere medîne-i Üsküdar kazâsından sefer-i hümâyûn içün ber-mûceb-i sûret-i defter-i mevkūfât beş bin beş yüz iki guruş ve bir rub‘ guruş bedel-i sürsat mâlı beher keyli otuzar akçeye olup ve zikr olunan sürsat mâlından verilmek üzere yine kazâ-i mezbûreden sekiz bin keyl şa‘îr iştirâ ve Üsküdar iskelesine nakli fermân olunup husûsât-ı mezbûrâtı mübâşir ta‘yîn olunan Haseki Ahmed Ağa yedine mu‘tâd-ı kadîm üzere mârru’z-zikr bedel-i sürsatın nısfı olan iki bin yedi yüz elli bir guruş ve beş para ve zikr olunan şa‘îrin nısfı olan dört bin keyl şa‘îr cem‘ ve tahsîl olunmak üzere mübâşir-i mûmâ-ileyh Haseki Ahmed Ağa yedine mümzâ ve mahtûm iki kıt‘a tevzî‘ defteri verilmekle bi’t-taleb mürâsele tahrîr ve irsâl olundu, vusûlünde gerekdir ki her biriniz husûsât-ı mezbûrâna gereği gibi takayyüd ve ihtimâm edip bir gün evvel cem‘ ve tahsîline ve mübâşir-i mûmâ-ileyhe teslîm etdirmekde sa‘y ü ihtimâm edip mûceb-i emr-i âlî ve mûceb-i mürâsele ile her biriniz âmil olasız ve’s-selâm. Hurrire fi’l-yevmi’s-sâmin min-Muharremi’l-harâm li-sene hamse ve ışrîn ve mi'e ve elf. El-Fakīr İsmail Ağa el-müvellâ-hilâfeten bi-medîneti Üsküdar.