Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 185 Hüküm no: 270 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruznamçe-i evvel Yeğen Mustafa'ya ait Adalar nahiyesindeki değirmenin oluğunu harabeden Abdi'nin yakalanarak muhakeme edilmesi Kıdvetü’n-nüvvâb ve’l-müteşerri‘în Adalar’da nâibü’ş-şer‘ olan Mevlânâ ( ) -zîde ilmuhû- tevkī‘-i refî‘-i hümâyûn vâsıl olıcak ma‘lûm ola ki, südde-i sa‘âdetime mektûb gönderip iftihârü’l-emâcid ve’l-ekârim Rûznâmçe-i evvel vekîli olan Yeğen Mustafa -dâme mecdühû-’nun nâhiye-i mezbûrede vâki‘ çiftliği kethüdâsı ve tarafından vekîli olan Ömer nâm kimesne meclis-i şer‘a varıp zikr olunan çiftlik değirmeninin oluğunu bin yüz yirmi üç senesinde yine nâhiye-i mezbûreye tâbi‘ Dolayobası nâm karye sâkinlerinden Abdi nâm kimesne fuzûlî taş ile doldurup harâb ve mu‘attal etmekle taraf-ı şer‘den mürâsele birle yeniçeri serdârı irsâl olunup mürâfa‘a-i şer‘ içün da‘vet-i şer‘ olundukda mezbûr Abdi firâr ve menzilinde ihtifâ eylediğini serdâr-ı merkūm ve ahâlî-i karye-i mezbûreden bî-garaz Müslimîn ihbâr etmeleriyle mezbûr menzilinde zâbiti ma‘rifetiyle meclis-i şer‘a ihzâr ve ahvâlleri şer‘le görülüp icrâ-yı hak olunmak bâbında emr-i şerîfim verilmek ricâsına ilhâhıyla arz etmeğin vech-i meşrûh üzere zâbiti ma‘rifetiyle ihzâr-ı şer‘ ve icrâ-yı hak olunmak emrim olmuşdur, buyurdum ki hükm-i şerîfimle vusûl buldukda bu bâbda sâdır olan emrim üzere amel dahi mezbûr zâbiti ma‘rifetiyle menzilinden meclis-i şer‘a ihzâr ve mukaddemâ bir def‘a şer‘le görülüp fasl olunmayan husûslarında tamâm hak ve adl üzere tefahhus edip göresiz, i‘lâm olunduğu üzere ise ol bâbda muktezâ-yı şer‘-i kavîmle amel edip dahi ba‘de’s-sübût icrâ-yı şer‘ ve ihkāk-ı hak eyleyip min-ba‘d şer‘-i şerîfe ve emr-i hümâyûnuma muhâlif kimesneye iş etdirmeyip husûs-ı mezbûr içün tekrâr emr-i şerîfim irsâline muhtâc eylemeyesin, şöyle bilesin, alâmet-i şerîfe i‘timâd kılasın. Fî-evâili şehri Ramazan sene selâse ve ışrîn ve mi'e ve elf. El-Kostantıniyyeti’l-mahrûse. Kad vasale ileynâ fî 12 Ramazan sene [1]123